Girish Mahajan : तहसील कार्यालयातील घाण पाहून गिरीश महाजन संतापले; हातात झाडू घेतली अन् स्वतःच…

जामनेर तहसील कार्यालयाला भेट दिल्यानंतर, राज्याचे मंत्री गिरीश महाजन यांनी कार्यालयातील अस्वच्छता आणि अयोग्य स्वच्छतेच्या स्थितीवर तीव्र नाराजी व्यक्त केली. बैठकीसाठी आलेल्या महाजनांना कार्यालयाच्या आवारात प्रवेश करतानाच अनेक ठिकाणी जाळे आणि अस्वच्छता दिसली. अस्वच्छतेचे भयाण चित्र पाहून महाजनांचा पारा चढला, विशेषतः जेव्हा त्यांना स्वच्छतागृहामध्ये दारूच्या रिकाम्या बाटल्या आणि इतर घाण आढळली.

भिंतीवर आणि कोपऱ्यांमध्ये थुंकलेले, तसेच दुर्गंधीयुक्त आणि ब्लॉक झालेले स्वच्छतागृह पाहून त्यांनी कर्मचाऱ्यांना चांगलेच धारेवर धरले. कार्यालयात लावलेल्या “५०० रुपये दंड” च्या मोठ्या पाट्या असूनही परिस्थितीमध्ये सुधारणा नसल्याचे त्यांनी निदर्शनास आणले. या प्रकारामुळे स्वतःला लाज वाटल्याचे सांगत, मंत्री महाजन यांनी तात्काळ बैठक बाजूला ठेवून स्वतः हातात झाडू घेऊन साफसफाई सुरू केली. दोन ऑक्टोबरला स्वच्छता मोहीम राबवली असतानाही कार्यालयाची ही दयनीय अवस्था पाहून त्यांनी चिंता व्यक्त केली.