मोठी बातमी! मुख्यमंत्र्यांना दिले तातडीचे निर्देश… झारखंड विद्यार्थी आंदोलनावर अखेर राहुल गांधींनी सोडलं मौन

राहुल गांधींनी झारखंडचे मुख्यमंत्री हेमंत सोरेन यांना एक महत्त्वाचे पत्र पाठवले आहे. हे पत्र झारखंडमध्ये सुरू असलेल्या विद्यार्थी आंदोलनासंदर्भात आहे, जे भरती परीक्षांमधील कथित अनियमिततेविरोधात सुरू आहे. राहुल गांधींनी या आंदोलनाला शांततापूर्ण आणि विद्यार्थ्यांच्या मागण्यांना वैध म्हटले आहे. या पत्रात राहुल गांधींनी आंदोलक विद्यार्थ्यांच्या मागण्यांकडे लक्ष वेधले आहे.

काही विद्यार्थी अनिश्चित काळासाठी उपोषणावर बसल्याबद्दल त्यांनी तीव्र चिंता व्यक्त केली आहे. राहुल गांधींनी मुख्यमंत्र्यांना आवाहन केले आहे की, त्यांनी स्वतः आंदोलक विद्यार्थ्यांच्या प्रतिनिधींसोबत भेटून त्यांच्या समस्या ऐकाव्यात आणि त्यावर तोडगा काढावा. तरुण हे भारताचे भविष्य आहेत आणि त्यांच्या प्रश्नांचे निराकरण करणे अत्यंत महत्त्वाचे आहे, असे राहुल गांधींनी पत्रात नमूद केले आहे. त्यांनी हेमंत सोरेन यांना विद्यार्थ्यांसोबत तातडीने संवाद साधून हा प्रश्न मार्गी लावण्याची विनंती केली आहे. या घटनेमुळे झारखंडमधील विद्यार्थी आंदोलनाकडे राष्ट्रीय पातळीवर लक्ष वेधले गेले आहे.