छप्पर उडालं, संसार उघड्यावर! महिलांच्या डोळ्यांतील अश्रू थांबेना; अवकाळी पावसाचा कहर

लातूर जिल्ह्याच्या रेणापूर तालुक्यात वादळी वाऱ्यासह अवकाळी पावसाने मोठे नुकसान केले आहे. दिघोळ देशमुख परिसरात अनेक घरांचे छप्पर उडून गेले आहे, तर संसारोपयोगी वस्तू पूर्णपणे भिजल्या आहेत. यामुळे स्थानिक नागरिक आणि शेतकरी मोठ्या अडचणीत सापडले आहेत.

या अवकाळी पावसामुळे ज्वारी, गहू, हरभरा आणि आंब्याच्या पिकांचे अतोनात नुकसान झाले आहे. अनेक शेतकऱ्यांच्या हातातोंडाशी आलेला घास हिरावला गेला आहे. या वादळामुळे अनेक कुटुंबांना अक्षरशः बेघर व्हावे लागले आहे.

एका मूकबधिर दाम्पत्याच्या घरावरची पत्रे उडून गेल्याने त्यांचा संसार पूर्णपणे उघड्यावर आला आहे. बोलता येत नसतानाही रोजंदारीवर काम करून उदरनिर्वाह करणाऱ्या या कुटुंबाला आता शेजाऱ्यांचा आधार घ्यावा लागत आहे. थंडीच्या वातावरणात घराबाहेर रात्र काढण्याची वेळ त्यांच्यावर आली आहे. ही परिस्थिती पाहून परिसरातील नागरिकांमध्ये चिंतेचे वातावरण आहे.