Manoj Jarange : पैसेवाल्यांना आंदोलनाला साथ द्यायची नाही का? जरांगे पाटलांचा सवाल; पुढे म्हणाले…

मनोज जरांगे पाटील यांनी पुन्हा एकदा मराठा आरक्षणाच्या भूमिकेवर ठाम राहत मुख्यमंत्री एकनाथ शिंदे यांच्यावर निशाणा साधला आहे. मुंबई शहरात मुख्यमंत्री एकनाथ शिंदे यांना मान उंचावून चालण्याची संधी गरीब मराठ्यांमुळेच मिळाल्याचा दावा जरांगे पाटलांनी केला. दरम्यान, यावर भाजप नेते प्रसाद लाड यांनी प्रतिक्रिया देत जरांगे आणि शिंदे यांचे संबंध जिवाळ्याचे असल्याचे म्हटले आहे. जरांगे पाटलांनी एकनाथ शिंदे आणि उदय सामंत यांच्याशी चर्चा करावी असा सल्ला लाड यांनी दिला.

या सल्ल्याला उत्तर देताना मनोज जरांगे पाटील यांनी चौकशीला सामोरे जाण्याची पूर्ण तयारी दर्शवली आहे. “आम्ही जेलमध्ये जायला तयार आहोत, पण समाजाला वाऱ्यावर सोडणार नाही,” असे जरांगे पाटील म्हणाले. “पैसेवाल्यांनी आंदोलनाला साथ द्यायची नाही का?” असा थेट सवाल त्यांनी उपस्थित केला. आरक्षणाशी कोणतीही तडजोड करणार नाही आणि मैत्रीसाठी आरक्षण सोडणार नाही, अशी ठाम भूमिका जरांगे पाटलांनी घेतली आहे.