Girish Mahajan | राडा करायलाही कोणी शिल्लक नाही; गिरीश महाजनांची ठाकरे गटावर बोचरी टीका!

विधान परिषद निवडणुकीसाठी आज मतदान प्रक्रिया पार पडत असताना नाशिक मतदारसंघाकडे राज्याचे विशेष लक्ष लागले आहे. महायुतीतील अंतर्गत घडामोडी आणि उमेदवारीवरून झालेल्या चर्चांमुळे हा मतदारसंघ चर्चेत राहिला आहे. या पार्श्वभूमीवर भाजपचे वरिष्ठ नेते आणि मंत्री गिरीश महाजन यांनी नाशिकमध्ये येऊन नगरसेवकांशी संवाद साधला.

माध्यमांशी बोलताना महाजन म्हणाले की, “गोकुळ गीते यांनी स्वतःच कार्यकर्त्यांना आणि मतदारांना नरेंद्र दराडे यांना मतदान करण्याचे आवाहन केले आहे. त्यामुळे आता कोणताही संभ्रम उरलेला नाही.”

निवडणुकीसाठी वरिष्ठ नेत्यांना स्वतः मैदानात उतरावे लागत असल्याबाबत विचारले असता त्यांनी सांगितले की, “निवडणूक छोटी असो किंवा मोठी, आम्ही प्रत्येक निवडणूक गांभीर्याने घेतो. कार्यकर्ते आमच्यासाठी मेहनत घेतात, त्यामुळे त्यांच्याशी संपर्क ठेवणे आणि त्यांना भेटणे ही आमची जबाबदारी आहे.”

महाजन यांनी महायुतीच्या विजयाचा विश्वास व्यक्त करताना सांगितले की, “आम्हाला अपेक्षेपेक्षा जास्त मतदान मिळेल. निवडणूक प्रक्रियेत कोणतीही ढिलाई नको म्हणून आम्ही विशेष काळजी घेत आहोत.”

यावेळी त्यांनी शिवसेना (उद्धव बाळासाहेब ठाकरे) गटावरही टीका केली. पक्षातील अलीकडील घडामोडी आणि नेत्यांच्या प्रतिक्रियांवर भाष्य करताना त्यांनी सांगितले की, पक्षातील अनेक नेते आणि कार्यकर्त्यांमध्ये नाराजी असल्याचे दिसून येत आहे.

दरम्यान, नाशिकमधील मतदान प्रक्रियेकडे आणि निकालाकडे राज्याच्या राजकीय वर्तुळाचे लक्ष लागले असून, निकालानंतर स्थानिक राजकारणातील समीकरणे अधिक स्पष्ट होण्याची शक्यता व्यक्त केली जात आहे.