Leopard Attack : स्वतःचा जीव वाचवा म्हणून गळ्याला खिळ्यांचा पट्टा, शिरूरमध्ये बिबट्यांची भलतीच दहशत! गेल्या काही दिवसात 12 मृत्यू

पुणे जिल्ह्यातील शिरूर पट्ट्यामध्ये बिबट्यांच्या वाढत्या हल्ल्यांमुळे ग्रामस्थांमध्ये, विशेषतः महिलांमध्ये, भीतीचे वातावरण आहे. बिबट्यांपासून स्वतःचा जीव वाचवण्यासाठी येथील महिला शेतात काम करताना गळ्यात खिळ्यांचे लोखंडी पट्टे घालत आहेत. बिबट्या किंवा वाघ प्रामुख्याने मानेवर हल्ला करतात, त्यामुळे किमान जीव सुरक्षित राहावा या हेतूने महिलांनी हा उपाय अवलंबला आहे.

गेल्या काही दिवसांपासून पुण्यातील ग्रामीण भागात बिबट्यांच्या हल्ल्यात तब्बल 12 जणांचा मृत्यू झाला आहे. जुन्नरमध्ये नुकतेच एका सीसीटीव्हीमध्ये तीन बिबटे एकाच वेळी आढळून आले, ज्यामुळे उत्तर पुणे जिल्ह्यातील बिबट्यांची संख्या मोठ्या प्रमाणावर वाढल्याचे स्पष्ट झाले आहे. या दहशतीमुळे महाराष्ट्रात लोकांना स्वतःच्या संरक्षणासाठी असे कठीण उपाय करावे लागत आहेत.