Sanjay Raut : भाजपची ही खेळी, ‘तो’ BJP चा बोलका पोपट… उत्तर भारतीय महापौर, या वक्तव्यावरून राऊतांचा हल्लाबोल
संजय राऊत यांनी कृपाशंकर सिंग यांच्या विधानावर तीव्र प्रतिक्रिया दिली आहे. भाजप मुंबईत मराठी महापौर होऊ न देण्याचा कट रचत असून, सिंग यांचे वक्तव्य त्याच कारस्थानाचा भाग असल्याचे राऊत यांचे म्हणणे आहे. मराठी माणसांविरुद्ध वातावरण निर्मिती करण्यासाठी भाजपने ही रणनीती आखली आहे, असा आरोप त्यांनी केला.
शिवसेना (उद्धव बाळासाहेब ठाकरे) नेते संजय राऊत यांनी कृपाशंकर सिंग यांच्या एका विधानावर तीव्र आक्षेप घेतला आहे. सिंग यांचे विधान हे केवळ अनावधानाने झालेले नसून, भाजपची मुंबईत मराठी महापौर होऊ न देण्याची पूर्वनियोजित खेळी आहे, असा आरोप राऊत यांनी केला आहे. भाजप कृपाशंकर सिंग यांना बोलका पोपट म्हणून वापरत असून, मुंबईत मराठी माणसाच्या डोक्यात दगड घालण्याचे त्यांचे कारस्थान आहे, असे राऊत यांनी म्हटले. राऊत यांच्या मते, भाजप परप्रांतीयांना शिवसेनेविरुद्ध किंवा महाराष्ट्र नवनिर्माण सेनेविरुद्ध आणि मराठी माणसांविरुद्ध मतदान करण्यासाठी प्रवृत्त करण्याचे वातावरण निर्माण करत आहे. भाजपला महाराष्ट्राच्या स्वाभिमानाशी काही देणेघेणे नाही. संयुक्त महाराष्ट्र लढ्यात किंवा सीमा प्रश्नात त्यांचा कधीही सहभाग नव्हता, असेही राऊत यांनी नमूद केले. कृपाशंकर सिंग यांच्या वक्तव्यामुळे मराठी-अमराठी वाद वाढवण्याचा प्रयत्न सुरू असल्याचा दावा राऊत यांनी केला.
