Shivsena Dasara Melava : उद्धव ठाकरेंच्या दसरा मेळाव्यात राज ठाकरे जाणार का? त्या निमंत्रणावर राजकीय सस्पेन्स कायम

उद्धव ठाकरे यांच्या दसरा मेळाव्याला महाराष्ट्र नवनिर्माण सेनेचे अध्यक्ष राज ठाकरे उपस्थित राहणार का, याबाबत राजकीय वर्तुळात सस्पेन्स कायम आहे. शिवसेना (उद्धव बाळासाहेब ठाकरे) नेते संजय राऊत यांनी मेळाव्यात विचारांचे आदान-प्रदान होऊ शकते, असे सूचक विधान केले असले तरी, त्यांनी निमंत्रणाबाबत थेट बोलणे टाळले. दुसरीकडे, मनसे नेते अविनाश अभ्यंकर यांनी अद्याप कोणतीही अधिकृत माहिती नसल्याचे स्पष्ट केले आहे. राज ठाकरे यांच्या दसरा मेळाव्यातील उपस्थितीबाबतचा निर्णय केवळ राज ठाकरेच घेतील, असे मनसेने म्हटले आहे.

मुंबई महानगरपालिका निवडणुकीच्या तोंडावर ठाकरे बंधूंच्या भेटीगाठी वाढल्या आहेत, ज्यामुळे त्यांच्या संभाव्य युतीची चर्चा पुन्हा एकदा जोर धरत आहे. मुंबईत ठाकरे बंधूंचे एकत्र पोस्टरही लावण्यात आले आहेत. ५ जुलै रोजी एकाच व्यासपीठावर उपस्थित राहण्यापासून ते मातोश्रीवरील भेटीपर्यंत, या भेटींना राजकीय महत्त्व आहे. महापालिका निवडणुकीत शिवसेनेची (उद्धव बाळासाहेब ठाकरे गट) सत्ता टिकवण्यासाठी हा मेळावा महत्त्वाचा मानला जात आहे.