Hambarda Morcha : हाती भगवा अन् मागण्यांचे फलक, ठाकरेंच्या हंबरडा मोर्चात शेतकरी अन् शिवसैनिकांची तुफान गर्दी

छत्रपती संभाजीनगर येथे शिवसेना (उद्धव बाळासाहेब ठाकरे) पक्षाने शेतकऱ्यांच्या विविध मागण्यांसाठी हंबरडा मोर्चाचे आयोजन केले. पक्षाचे प्रमुख उद्धव ठाकरे यांच्या नेतृत्वाखाली हा मोर्चा क्रांतीचौकातून गुलमंडी चौकापर्यंत काढण्यात आला. मराठवाडा आणि राज्यातील अनेक भागांतील शेतकरी पुराच्या तडाख्याने संकटात आहेत. राज्य सरकारने ३१ हजार ६२८ कोटी रुपयांचे पॅकेज घोषित केले असले तरी, शेतकऱ्यांच्या खात्यात अजूनही मदतीची रक्कम पोहोचलेली नाही, असा पक्षाचा दावा आहे.

या मोर्चातील प्रमुख मागण्यांमध्ये शेतकऱ्यांसाठी संपूर्ण कर्जमाफी, प्रति हेक्टरी ५० हजार रुपये मदत आणि पीक विमा योजनेचा लाभ सर्व शेतकऱ्यांना मिळावा यांचा समावेश आहे. उद्धव ठाकरे यांच्यासह आदित्य ठाकरे, संजय राऊत, अरविंद सावंत, अंबादास दानवे, चंद्रकांत खैरे यांसारखे पक्षाचे महत्त्वाचे नेते या मोर्चात सहभागी झाले होते. हा मोर्चा केवळ शेतकऱ्यांच्या मागण्यांसाठी नसून, शिवसेना (उद्धव बाळासाहेब ठाकरे) पक्षाचे मराठवाड्यातील एक शक्ती प्रदर्शन म्हणूनही पाहिले जात आहे. गुलमंडी चौकात या मोर्चाचे जाहीर सभेत रूपांतर होणार असून, तेथे उद्धव ठाकरे राज्य सरकारच्या शेतकरी धोरणावर आपली भूमिका मांडतील.