New Generation : कॉर्पोरेट घराण्यांमध्ये नवीन पिढीचा उदय! नवीन मालक घेणार जबाबदारी

नवी दिल्ली | 2 सप्टेंबर 2023 : ‘आता आम्ही आरामाने बसून नवीन पिढी आमच्यापेक्षा कशी जोरदार कामगिरी करते हे पाहत त्यांचे कौतूक केले पाहिजे’, असे मुकेश अंबानी (Mukesh Ambani) यांनी म्हटले होते. नवीन पिढीकडे धुरा सोपविण्याची वेळ आली आहे, असे त्यांनी 2021 सालीच संकेत दिले होते. तेव्हापासूनच रिलायन्स इंडस्ट्रीजमध्ये जबाबदारी नवीन पिढीवर टाकण्यात येईल हे स्पष्ट झाले होते. या वक्तव्यानंतर अडीच वर्षांनी रिलायन्समध्ये (Reliance Industry) खांदेपालट झाली. रिलायन्स इंडस्ट्रीजच्या संचालक मंडळात मुकेश अंबानी यांच्या नवीन पिढीला संधी देण्यात आली. देशभरातील अनेक उद्योग घराण्यात हाच ट्रेंड सुरु आहे. आता नवीन पिढीने सूत्र हाती घ्यावी यासाठी नियोजन सुरु करण्यात आले आहे. भाकरी फिरवण्याचे संकेत अनेक उद्योजकांनी काही वर्षांपासूनच दिले आहे. त्यानुसार, नवीन पिढी (New Generation) घडविण्याचे काम सुरु होते. आता या नव्या पिढीवर कामाची जबाबदारी सोपविण्यात आली आहे.

नव्या पिढीवर भार

मुकेश अंबानी यांनी त्यांची मुलगी ईशा, मुलगा आकाश आणि अनंत यांना रिलायन्स इंडस्ट्रीजच्या संचालक मंडळात सहभागी करुन घेतले. देशातील वेगवेगळ्या कॉर्पोरेट घरण्यातील पॅटर्न पाहाता अनेक उद्योगात नवीन पिढीच्या हातीच कारभाराची सूत्र असल्याचे दिसून येते.

हे मालक झाले निवृत्त

अनेक कॉर्पोरेट घराणे, मोठ्या कंपन्यांचे प्रमुख अगोदरच निवृत्त झाले आहे. यामध्ये एल अँड टीचे ए. एम. नाईक, एचडीएफसीचे दीपक पारेख, कोटक महिंद्रा बँकेचे उदय कोटक यांचा समावेश आहे. यामध्ये रतन टाटा, आदि गोदरेज, अजिम प्रेमजी, शिव नादर यांनी तर कधीचीच निवृत्ती स्वीकारली. त्यांना निवृत्त होऊन 10 वर्षांचा कालावधी लोटला.

हे पण घेणार निर्णय

या यादीत डॉ. प्रताप रेड्डी, आरसी भार्गव, नुस्ली वाडिया, बाबा कल्याणी, हर्ष मारीवाला, वेणू श्रीनिवासन, किरण मजूमदार-शॉ, पवन मुंजाल, अनिल अग्रवाल, आनंद महिंद्रा, नंदन नीलेकणि, अजय पीरामल, दिलीप सांघवी आणि सुनील मित्तल हे पण काही दिवसांत पूर्णपणे निवृत्त होतील अशी शक्यता आहे. अथवा हे दिग्गज त्यांच्या कामाचा भार हलका करतील.

नव्या पिढीला संधी

बजाज, अपोलो, भारत फोर्ज कंपन्यांमध्ये दुसऱ्या आणि तिसऱ्या पिढीच्या सदस्यांनी कामास सुरुवात केली आहे. सिप्ला सारख्या कंपन्यांमध्ये पण उत्तराधिकारी समोर येत आहेत. महिंद्रा समूह, एशियन पेंट्स, मॅरिको आणि गोदरेज कुटुबांना यापूर्वीच कंपनी व्यवस्थापनात जागा देण्यात आली आहे.