मागाठाणे विधानसभा निवडणूक निकाल 2024

दहिसरचा काही भाग आणि बोरिवलीचा काही भाग मिळून मागाठाणे हा विधानसभा मतदारसंघ तयार झाला. 2009 ला या मतदारसंघाची निर्मिती झाली आहे. मराठी भाषिक मतदार या मतदारसंघात अधिक आहे. 2009 ला पहिल्यांदाच या मतदारसंघात मतदान झालं. तेव्हा मनसेत असणारे प्रविण दरेकर या मतदारसंघात विजयी झाले होते. त्यानंतर 2014 ला प्रकाश सुर्वे हे विजयी झाले. राष्ट्रवादीला रामराम करत प्रकाश सुर्वे यांनी शिवसेनेत प्रवेश केला. त्यांनी ही जागा जिंकली. तर 2019 ला प्रकाश सुर्वे यांनी पुन्हा एकदा या मतदारसंघातून निवडून आले.

आताची राजकीय स्थिती काय?

2022 ला शिवसेनेत उभी फूट पडली. एकनाथ शिंदे यांनी भाजपसोबत जात सत्ता स्थापन केली. यावेळी शिंदेंसोबत गेलेल्या आमदारांमध्ये प्रकाश सुर्वे यांचंही नाव आहे. त्यामुळे यंदाच्या या निवडणुकीत महायुती कुणाला उमेदवारी देणार? प्रकाश सुर्वे यांना पुन्हा उमेदवारी मिळणार का? तसंच महाविकास आघाडी कुणाला निवडणुकीच्यां रिंगणात उतरवणार? हे पाहावं लागणार आहे.

2019मध्ये काय झालं?

2019 च्या विधानसभा निवडणुकीत मागाठाणे मतदारसंघात प्रकाश सुर्वे विजयी झाले होते. 90,206 मतं प्रकाश सुर्वे यांना मिळाली होती. तर मनसे पक्षाचे नयन कदम यांना 49,146 मतं मिळाली होती. भाजपचे हेमेंद्र रतीलाल मेहता यांनीही मागाठाणेतून निवडणूक लढली होती.