Maharashtra News LIVE : बंगालला आज मिळणार नवा मुख्यमंत्री, सुवेंदू अधिकारी यांचा आज शपथविधी

लग्नाच्या अक्षता टाकून परतणाऱ्या पती-पत्नीचा अपघातात मृत्यू

बीडच्या गेवराई तालुक्यातुन जाणाऱ्या कल्याण-विशाखापट्टणम महामार्गावर कोळगावजवळ एका भरधाव टेम्पोने दुचाकीला समोरून जोरदार धडक दिली. या भीषण अपघातात शिरूर कासार तालुक्यातील निमगाव मायंबा येथील पती-पत्नीचा मृत्यू झाला.  लग्नकार्य आटोपून बाबूराव राम बळे आणि पत्नी मंगल बळे दुचाकीवरून घरी परत जात असताना हा अपघात घडला. चकलांबा पोलिसांनी घटनास्थळी पोहोचून मृतदेह ताब्यात घेतले. टेम्पो चालकाविरुद्ध गुन्हा दाखल करण्यात आला आहे.

पंढरपुरातील प्रसिद्ध ओम रेसिडेन्सी येथील वॉचमनला दांडक्याने बेदम मारहाण

पंढरपुरातील प्रसिद्ध ओम रेसिडेन्सी येथील वॉचमनलादांडक्याने बेदम मारहाण करण्यात आली.  गाडी पार्किंग करण्यावरून बाचाबाची झाली,  अज्ञात चार जणांच्या टोळक्याने दांडक्याने वॉचमनला मारहाण केली . मारहाणीची घटना सीसीटीव्हीत कैद झाली असून मारहाणीत वॉचमन प्रशांत राऊळ गंभीर जखमी झालेत.

अमरावती जिल्ह्यात अवकाळी पाऊस , गारपीट, गावाला फटका

अमरावती जिल्ह्यातील अंजनगाव बारी गावाला अवकाळी पाऊस आणि गारपिटीचा मोठा फटका बसला आहे.  शेतकऱ्याच्या शेतातील केळीच्या बागेचं प्रचंड नुकसान झालं आहे. निखिल भोपळे या शेतकऱ्याच्या केळीच्या बागेतील दोन हजार पैकी पंधराशे झाडं जमीनदोस्त झाली.

केळी उत्पादक शेतकऱ्यांचे लाखो रुपयांचे नुकसान झाले तसेच कांदा, गहू, संत्रा बागांनाही मोठा फटका बसला.  तात्काळ पंचनामा करून मदत देण्याची मागणी शेतकऱ्यांनी केली आहे.

नाशिक – निदा खानला आश्रय देणाऱ्या एमआयएमचे नगरसेवक मतीन पटेल यांचा मोबाईल जप्त

नाशिक –  TCS कंपनीतील लैंगिक अत्याचारासह धर्मांतरण प्रकरणी अटकेत असलेली निदा खान हिला आश्रय देणारे छत्रपती संभाजीनगर एमआयएमचे नगरसेवक मतीन पटेल यांचा मोबाईल पोलिसांनी जप्त केला .  एमआयएम चे नगरसेवक मतीन पटेल यांना गुन्ह्यात सहआरोपी केलं आहे.  निदा खानला आश्रय दिल्याप्रकरणी ही कारवाई करण्यात आली आहे.

हिंगोली – सकाळपासून अवकाळी पावसाला सुरूवात

हिंगोलीशहरासह परिसरात सकाळी पासून च अवकाळी पावसाला सुरुवात झाली आहे. जिल्ह्यात अनेक ठिकाणी रिमझिम पाऊस पडत आहे. मात्र बदलत्या वातावरणाचा फटका लग्न सराईला बसला आहे.

नाशिक – मध्यरात्रीपासून CNG च्या दरांमध्ये वाढ

नाशिकमध्ये मध्यरात्रीपासून CNG च्या दरांमध्ये वाढ झाली आहे.  1 किलो मागे तब्बल 1.50 रुपयांची वाढ झाली .  पूर्वी CNG चे दर 93.65 रुपये प्रति किलो होते,  रात्रीपासून CNG दर 95.15 रुपये प्रति किलो झाले आहेत.  एक वर्षानंतर CNG दरांमध्ये वाढ झाली असून आता CNG आणि डिझेलचे दर जवळपास झाले सारखेच आहेत.

पश्चिम बंगालमध्ये सुवेंदू अधिकारी यांचा शपथविधी, कोलकात्यात कडक सुरक्षा तैनात

कोलकाता येथे सुवेंदू अधिकारी यांच्या शपथविधी सोहळ्यासाठी कडक सुरक्षा व्यवस्था करण्यात आली आहे. ब्रिगेड परेड ग्राऊंडच्या आसपासच्या उंच इमारतींमधून सुरक्षेवर लक्ष ठेवले जाईल. ब्रिगेडबाहेर शहरातील व्हीव्हीआयपींच्या सुरक्षेवर लक्ष ठेवण्यासाठी ड्रोनचा वापर केला जाईल.