पहिल्यांदाच खऱ्या फॅक्टरीमध्ये मालिकेचं शूटिंग; श्वेता शिंदेची ‘हुकुमाची राणी ही’ लवकरच प्रेक्षकांच्या भेटीला
अभिनेत्री श्वेता शिंदे निर्मित 'हुकुमाची राणी ही' हा मालिका लवकरच प्रेक्षकांच्या भेटीला येत असून यामध्ये अक्षय पाटील आणि वैभवी चव्हाण यांच्या मुख्य भूमिका आहेत. सन मराठी वाहिनीवर ही मालिका प्रसारित होणार आहे.
‘सन मराठी’ वाहिनीवर येत्या 21 एप्रिलपासून दररोज संध्याकाळी 7 वाजता ‘हुकुमाची राणी ही’ मालिका प्रेक्षकांच्या भेटीला येणार आहे. ‘हुकुमाची राणी ही’ या मालिकेतील नायक – नायिकेची गोष्ट ही फॅक्टरीमधूनच सुरु होणार आहे. मालिकेचं शूटिंगही खऱ्या फॅक्टरीमध्ये होत आहे आणि हाच धागा पकडून मालिकेची पत्रकार परिषद सातारामधील फॅक्टरीमध्ये पार पडली. बऱ्याचदा मालिकांमध्ये ऑफिस, फॅक्टरी या ठिकाणांसाठी सेट उभारला जातो. पण या मालिकेचं शूटिंग साताऱ्यामधील खऱ्या फॅक्टरीमध्ये पार पडणार आहे. या मालिकेच्या टीमसाठी ही एक आव्हानात्मक बाब असणार आहे.
मालिकेत अभिनेत्री वैभवी चव्हाण ही राणीची भूमिका तर इंद्रजीतची भूमिका अक्षय पाटील साकारत आहे. या दोघांबरोबरच अभिनेत्री अंकिता पनवेलकर, अभिनेते राहुल मेहंदळेंसह आणखी बरेच दिग्गज कलाकारही मालिकेत महत्वाच्या भूमिका साकारताना दिसणार आहेत. मालिकेत राहुल मेहंदळे हे जयसिंगराव महाडिक या महत्त्वपूर्ण भूमिकेत पाहायला मिळणार आहेत. महाडिक इंडस्ट्रीचे सर्वेसर्वा जयसिंगराव महाडिक सेवानिवृत्त झाल्यानंतर महाडिक इंडस्ट्रीचा कारभार त्यांच्या मुलाकडे सुपूर्द करतात. जयसिंगराव असा निर्णय घेतात ज्यामुळे राणीचा महाडिक इंडस्ट्रीमध्ये प्रवेश होतो. आता माणुसकी जपणारी राणी आणि माणुसकीपेक्षा पैशाला महत्त्व देणारा इंद्रजीत समोरासमोर येणार तेव्हा नक्की काय होणार? हे पाहणं रंजक ठरणार आहे.
View this post on Instagram
या मालिकेची निर्माती आणि अभिनेत्री श्वेता शिंदे पत्रकार परिषेदत म्हणाली, “मालिकाविश्वात पहिल्यांदाच खऱ्या फॅक्टरीमध्ये ‘हुकुमाची राणी ही’ मालिकेचं शूटिंग सुरू केलं आहे. हे मोठं पाऊल आम्ही उचललं आहे. याचसह इंद्रजीत आणि राणीची नवी गोष्ट प्रेक्षकांच्या मनावर अधिराज्य गाजवायला सज्ज झाली आहे. या मालिकेसाठी प्रेरणास्थान म्हणायला गेलं तर माझ्या आईची फॅक्टरी आहे. महाडिक इंडस्ट्रीमध्ये जशी राणी आहे अगदी तशीच राणी आमच्या फॅक्टरीमध्ये पण होती. आणि त्या राणीला पाहूनच ही गोष्ट सुचली. या मालिकेतून प्रेक्षकांचं मनोरंजन तर होईलच पण माणुसकी जपण्याचा सल्ला मिळणार आहे. प्रेक्षकांनी मालिकेच्या प्रोमोवर जसा प्रेमाचा वर्षाव केला अगदी तसेच मालिकेवरही प्रेक्षक भरभरून प्रेम करतील अशी खात्री आहे.”
