“मी फक्त एकाच गोष्टीला घाबरते, ती म्हणजे….”, पंकजा मुंडेंनी केला खुलासा

Pankaja Munde Dasara Melava 2024 : महाराष्ट्रातील विधानसभा निवडणूक तोंडावर येऊन ठेपली आहे. आज दसऱ्यानिमित्त राजकीय घडामोडींना वेग आला आहे. शिवसेनेच्या पारंपारिक दसरा मेळाव्याप्रमाणेच अनेक राजकीय नेत्यांकडून दसरा मेळावे आयोजित करण्यात आले आहेत. नुकतंच भाजप नेत्या पंकजा मुंडे यांचा दसरा मेळावा पार पडला. दरवर्षीप्रमाणे यंदाही बीड जिल्ह्यातील भगवान गडावर हा मेळावा आयोजित करण्यात आला होता. यावेळी पंकजा मुंडेंसह धनंजय मुंडे, प्रीतम मुंडे, सुजय विखे पाटील यांसह अनेक पदाधिकारी उपस्थित होते. यावेळी पंकजा मुंडेंनी ऊसतोड कामागारांचे प्रश्न मांडले.

पंकजा मुंडे यांनी दसरा मेळाव्यात मी गरीबांसाठी काम करणारी आहे. राजकारणाला चिटकून बसणारी नाही. पाच लेकरांनी जीव दिला. त्या आमदारकीचं काय गोड वाटणार आहे, असे विधान केले. त्यासोबतच त्यांनी मला फक्त एकाच गोष्टीची भीती वाटते, असे म्हणत एक मोठा खुलासा देखील केला.

असा दिवस कधीच येऊ देऊ नको

कितीही वर्ष लागो तुमचं जीवन सुसह्य केल्याशिवाय मी श्वास घेणार नाही. तुमच्या मुलांच्या अंगावरचा मळका शर्ट पाहून मला वेदना होते. पंकजा मुंडे कुणाला घाबरत नाही. अंधारात भेटत नाही. पंकजा मुंडे फक्त एकाच गोष्टीला घाबरते. या मैदानात माझं भाषण ऐकायला लोकं येणार नाही त्या दिवसाला घाबरते. भगवान बाबांना प्रार्थना करते असा दिवस कधीच येऊ देऊ नको. मी मंत्री असताना विकास केला. रस्ते दिले. या बीड जिल्ह्याला ऐतिहासिक विमा दिला. एकही गाव सोडलं नाही, असे पंकजा मुंडेंनी सांगितले.

जातीवर स्वार होणाऱ्यांच्या मागे उभं राहायचं

यावेळी गडबड झाली. आपल्याला ही गडबड दुरुस्त करायची आहे. छत्रपती घराण्याने गोपीनाथ मुंडे यांच्यावर प्रेम केलं. मी उदयनराजेंच्या प्रचाराला गेले,. त्यांनी मला त्यांच्या देवघरात नेलं. माझ्या हाताने आरती केली. त्यानंतर एका घरात नेलं तिथल्या खांबावर त्यांच्या वडिलांचा आणि गोपीनाथ मुंडे यांचा फोटो आहे. आम्ही जात बघून काम करत नाही. आम्ही काम करणाऱ्या माणसाच्या मागे उभं राहायचं आहे. जातीवर स्वार होणाऱ्यांच्या मागे उभं राहायचं आहे, असेही पंकजा मुंडे म्हणाल्या.