Sanjay Raut: कर नाही त्याला डर कशाला? संजय राऊतांचे भाजपला ओपन चॅलेंज, अजितदादांच्या अपघाती मृत्यूसंदर्भात तो आरोप काय?

Sanjay Raut on Baramati Byelection: अजितदादांचा 28 जानेवारी रोजी विमान अपघातात बारामती येथे मृत्यू झाला. त्यानंतर आमदार रोहित पवार यांनी या विमान अपघाताप्रकरणी गुन्हा दाखल करावा आणि व्ही. के. सिंग यांना अटकेची मागणी लावून धरली आहे. राज्यात गुन्हा नोंदवला नसला तरी कर्नाटकमध्ये झिरो एफआयआर झालेला आहे. तर आता बारामती पोटनिवडणूक बिनविरोध करण्यासाठी प्रयत्न सुरू आहेत. त्याचवेळी काँग्रेसने अजितदादांच्या विमान अपघाताप्रकरणी गुन्हा नोंदवण्याची मागणी केली आहे. याप्रकरणात खासदार संजय राऊत यांनीही उडी घेतली आहे. त्यांनी काँग्रेसची भूमिका योग्य ठरवत भाजपला ओपन चॅलेंज दिले आहे.

कर नाही तर डर कशाला?

अजितदादांच्या विमान अपघातात महाराष्ट्रामध्ये गुन्हा दाखल करावा अशी रोहित पवार हे मागणी करत आहेत. तीच मागणी काँग्रेसचे प्रदेशाध्यक्ष हर्षवर्धन सपकाळ आणि उमेदवार आकाश मोरे करत आहेत ना. स्वतः मुख्यमंत्री म्हणत आहेत की अजित पवार यांच्या अपघातासंदर्भातील सत्य खणून काढू. खोलपर्यंत जाऊन तपास करू. पण त्यासाठी अगोदर एफआयआर नोंदवावा लागेल. तुम्ही एफआयआर नोंदवायला तयार नाहीत. तुम्ही संबंधित विमान कंपनीवर गुन्हा दाखल करायला तयार नाहीत. ही मागणी सुनेत्रा पवार, पार्थ पवार, जय पवारांनी करायला हवी. ती मागणी रोहित पवार करत आहेत आणि आम्ही सर्व करत आहोत.

काँग्रेसच्या मागणीचा विचार झाला तर महाराष्ट्रावर उपकार होतील. म्हणजे जो काय संशय आहे भारतीय जनता पक्षाच्या संदर्भात आणि अपघातासंदर्भात, कर नाही तर डर कशाला? तुम्हाला त्यामध्ये खरोखरच गुन्हा दाखल करायचा आहे ना, तुम्हाला भीती नसेल तर गुन्हा दाखल करा. तुम्ही का लांब पळत आहेत. विरोधकांवर खरे-खोटे धडाधड गुन्हे दाखल करत आहात. पण तुमचा एक जवळचा सहकारी, राज्याचे उपमुख्यमंत्री, मुख्यमंत्री म्हणतायेत त्याप्रमाणे जीवाभावाचा मित्र आणि सहकारी गमावला असे म्हणतायेत ना. मग त्या जीवाभावाच्या सहकारी आणि मित्राच्या संशयास्पद मृत्यूसंदर्भात तुम्ही गुन्हा का दाखल करत नाहीत, असा सवाल संजय राऊत यांनी केला.

पार्थ पवार यांना दिल्या शुभेच्छा

पार्थ पवार आज राज्यसभेच्या खासदारकीची शपथ घेत आहेत. तरुण कार्यकर्ता संसदीय कार्यप्रणातील सहभागी होत असेल तर सुभेच्छा दिल्या पाहिजे. त्यांच्या घरात आदर्श आहे, शरद पवार, सुळे, अजित पवार ह्यांच्या मार्गावर चालले तर चांगले संसदपट्टू होतील. आपल्या आजोबांकडून त्यांनी धडे घ्यायला हवेत असे संजय राऊत म्हणाले.