Marathi News Photo gallery Ashwini bhave san francisco usa home tour lavish interior marathi actress doing gardening outside home
Ashvini Bhave: अश्विनी भावे यांचं अमेरिकेतलं घर; सुंदर बाग, घरच्या भाज्या अन् कलाकारांसाठी खास पाहुणचार!
Ashvini Bhave Home Tour: अभिनेत्री अश्विनी भावे यांचं सॅन फ्रान्सिस्कोमधील आलिशान घर सोशल मीडियावर चर्चेत आलं आहे. विविध कलाकारांनी त्यांच्या या सुंदर घराला भेट दिली आहे.
स्वाती वेमूल |
Updated on: Oct 01, 2026 | 11:46 AM
Share
‘अशी ही बनवाबनवी’, ‘धडाकेबाज’, ‘हीना’ यांसारख्या चित्रपटांमधून प्रेक्षकांच्या मनात घर केलेल्या अभिनेत्री अश्विनी भावे सध्या अमेरिकेतील सॅन फ्रान्सिस्कोमध्ये कुटुंबासह राहतात. अभिनयापासून काहीशा दूर असल्या तरी सोशल मीडियावर त्या सक्रिय आहेत. विशेष म्हणजे, अमेरिकेत राहत असूनही त्यांचं घर आणि जीवनशैली पाहिल्यावर त्यांच्यातील मराठमोळेपणा प्रकर्षाने जाणवतो.
1 / 6
त्यांच्या घरी अनेक मराठी आणि बॉलिवूड कलाकारांनी भेट दिली असून, अश्विनी भावे उत्तम होस्ट म्हणूनही ओळखल्या जातात. अश्विनी भावेंच्या घराचं सर्वात लक्षवेधी वैशिष्ट्य म्हणजे घराच्या मागच्या बाजूला त्यांनी फुलवलेली हिरवीगार बाग. या बागेत विविध फुलं, फळं आणि भाज्या त्या स्वतः पिकवतात.
2 / 6
अमेरिकेत राहूनही अंगणात भाजीपाला पिकवण्याची भारतीय परंपरा त्यांनी जपली आहे. घरच्या बागेत पिकवलेल्या ताज्या भाज्यांचा वापर त्या स्वयंपाकातही करतात. या बागेशी संबंधित त्यांनी ‘द ग्रीन डोअर’ हा उपक्रमही सुरू केला होता. सोशल मीडियाच्या माध्यमातून त्या घरच्या बागेत कोणत्या भाज्या पिकवतात, त्यांची निगा कशी राखतात आणि घरच्या घरी भाजीपाला कसा उगवता येतो, याची माहिती देत होत्या.
3 / 6
अश्विनी भावे यांचं अमेरिकेतील घर हे केवळ त्यांचं कुटुंबीयांचं घर नसून कलाकार मित्रांसाठीही जणू भेटीचं ठिकाण बनलं आहे. डॉ. मोहन आगाशे, अमोल पालेकर, सचिन खेडेकर, आदिनाथ कोठारे, सोनाली कुलकर्णी, अवधूत गुप्ते, वैदेही परशुरामी, स्वप्नील जोशी आणि गजेंद्र अहिरे यांसारख्या अनेक कलाकारांनी त्यांच्या घरी भेट दिली आहे.
4 / 6
या भेटीदरम्यान अश्विनी यांनी पाहुण्यांना आपल्या घराभोवतीच्या बागेची सफरही घडवली होती. अलीकडेच नीना कुलकर्णी आणि अमृता सुभाष यांच्यासह ‘असेन मी नसेन मी’ नाटकाच्या टीमनेही त्यांच्या घरी भेट दिली. बागेतील ताजे टोमॅटो आणि भाज्या पाहून पाहुणेही भारावून गेले.
5 / 6
अश्विनी भावेंच्या घरातील हिरवळ, घरगुती वातावरण, बागकामाची आवड आणि पाहुण्यांचं मनापासून स्वागत करण्याची पद्धत यामुळे हे घर सेलिब्रिटी लाइफस्टाइलपेक्षा एका उबदार, मराठमोळ्या घरासारखं वाटतं. परदेशात राहूनही मातीशी आणि आपल्या संस्कृतीशी जोडलेलं हे जीवन त्यांच्या चाहत्यांना विशेष भावतं.
