घरी पुरणपोळी करायची, लुसलुशीत होईल की नाही टेन्शन आलंय…; मग ‘ही’ एक ट्रिक नक्की वापरा
होळीच्या सणाच्या निमित्ताने, या लेखात आम्ही मऊ आणि लुसलुशीत पुरणपोळ्या बनवण्याची सोपी पद्धत सांगत आहोत. प्रथमच पुरणपोळी बनवणाऱ्यांनाही यश मिळेल. गोड आणि खमंग पुरणपोळ्यांचा आस्वाद घ्या!
होळी रे होळी, पुरणाची पोळी... असं म्हणत दरवर्षी पुरणपोळीवर ताव मारला जातो. होळी या सणाला अवघा एक आठवडा शिल्लक राहिला आहे. होळी म्हटलं की पहिल्यांदा डोळ्यासमोर येते ती म्हणजे पुरणपोळी.
1 / 12
खायला गोड, खमंग, लुसलुशीत लागत असलेली पुरणपोळी बनवणं तसं अवघडं काम…. पुरणपोळी बनवायचं म्हटलं तर डाळ नीट शिजेल ना, मैद्याचे पीठ नीट होईल नाही, पोळी गोड होईल का…असे एक ना हजार प्रश्न गृहिणींना पडतात.
2 / 12
जर कोणी पहिल्यांदा पुरणपोळी बनवत असेल तर मात्र विचारायला नको… त्या कशा होतील, करपणार तर नाहीना? सारण बाहेर येईल का? साखरेचा आणि पीठाचा अंदाज चुकणार नाही ना, असे अंसख्य विचार मनात येतात.
3 / 12
प्रत्येक ठिकाणी पुरणपोळी तयार करण्याची पद्धत वेगवेगळी असते. तसेच अनेक महिलांची पुरणपोळी बनवण्याची पद्धत वेगळी असते. पोळ्या मऊ आणि तोंडात टाकल्याबरोबरचं जीभेवर विरघळतील अशा असाव्यात, असे अनेकांना वाटतं. त्यामुळे आज आम्ही तुम्हाला मऊ आणि लुसलुशीत पुरणपोळ्या कशा करायच्या, याच्या काही टीप्स देणार आहोत.
4 / 12
साहित्य – एक कप चणा डाळ, ए कप किसलेला गूळ, एक कप मैदा, 7 ते 8 टे. स्पून तेल, 1 टी स्पून वेलची पूड, मैदा पोळी लाटण्यासाठी
5 / 12
कुकरमध्ये चणाडाळीच्या अडीचपट पाणी घालून चणाडाळ व्यवस्थित शिजवून घ्या. डाळ शिजली की, त्यातील पाणी काढून घ्या. या पाण्याचा वापर करुन तुम्ही कटाची आमटी तयार करु शकता.
6 / 12
डाळीतील पाणी निघून गेल्यावर ती डाळ एका भांड्यात घ्यावी. त्यात किसलेला गूळ घालावा. त्यानंतर मध्यम आचेवर हे मिश्रण आटवावे. ते आटवताना वरचेवर ढवळत रहा. जर तुम्ही ते मिश्रण ढवळले नाहीत, तर ते करपू शकतो.
7 / 12
यानंतर पुरणात चमचाभर वेलची पूड घाला. मिश्रण घट्ट झाले की गॅस बंद करा. ते मिश्रण गरम असताना पुरण यंत्रातून फिरवून घ्यावे. कारण मिश्रण थंड झाल्यावर ते नीट वाटले जात नाही.
8 / 12
यानंतर मैदा घेऊन त्यात 5 ते 6 चमचे तेल आणि थोडीशी हळद मिसळावी. हे पीठ सैलसर मळून घ्यावे. भिजवलेले पीठ 2 तास ठेवून द्या.
9 / 12
यानंतर पुरणाचे लहान गोळे बनवून घ्यावे. तसेच मैद्याच्या पीठाचे गोळे बनवून घ्या. त्याची पातळसर पारी बनवून घेऊ त्यात पुरणाचा गोळा भरावा. हा सर्व बाजूंनी बंद करून घ्यावा.
10 / 12
यानंतर थोडासा मैदा टाकून हलक्या हाताने पोळी लाटून घ्या. तव्यावर खरपूस भाजून घ्या. साजूक तूप घालून गरम गरम खा. या पोळ्या टिकाऊ असतात. थंड पोळ्या दूधाबरोबर छान लागतात.
11 / 12
पुरणपोळी भाजताना गॅस मध्यम किंवा मंद आचेवर ठेवा. तव्यावर पोळी भाजतेवेळी ती सोनेरी लालसर रंग येईपर्यंत भाजा. पुरणपोळी झाल्यावर ती डब्यात किंवा एखाद्या भांड्यात ठेवू नका. ती एखाद्या कागदावर गार होऊ द्या. त्यानंतर त्या पोळ्या डब्यात भरा.
