Bhandup BEST Accident : बेस्ट बसच्या धडकेत चौघांचा मृत्यू, 9 जखमी; मुंबईच्या भांडुपमध्ये घडलं काय?

मुंबईतील भांडुप स्टेशनच्या पश्चिम बाजूला एक भीषण अपघात घडला आहे. येथे बेस्ट बस मागे घेताना झालेल्या धडकेत चौघांचा दुर्दैवी मृत्यू झाला असून नऊ जण जखमी झाले आहेत. हा अपघात भांडुप स्टेशनजवळील नेहमी गजबजलेल्या परिसरात झाला. जखमींना तात्काळ रुग्णालयात दाखल करण्यात आले आहे, जिथे त्यांच्यावर उपचार सुरू आहेत आणि त्यांची प्रकृती सध्या स्थिर असल्याचे सांगण्यात येत आहे. अपघातानंतर बसच्या मागच्या बाजूचे मोठे नुकसान झाले आहे. घटनेची माहिती मिळताच अग्निशमन दल, स्थानिक पोलीस आणि रुग्णवाहिका त्वरित घटनास्थळी पोहोचल्या. पोलिसांनी घटनास्थळाचा पंचनामा केला असून अपघाताच्या नेमक्या कारणांचा शोध घेण्यासाठी चौकशी सुरू केली आहे.