Ladki Bahin Yojana : लाडक्या बहिणींनो आता नो टेन्शन…जोपर्यंत देवाभाऊ तोपर्यंत… मुख्यमंत्र्यांकडून योजनेबद्दल मोठं वक्तव्य

मुख्यमंत्री देवेंद्र फडणवीस यांनी फलटण येथे विविध विकासकामांच्या उद्घाटनाप्रसंगी नागरिकांना संबोधित केले. या कार्यक्रमात त्यांनी लाडकी बहिण योजना बंद न करण्याच्या आपल्या भूमिकेचा पुनरुच्चार केला. जोपर्यंत एकनाथ शिंदे, अजित पवार आणि आपण स्वतः सत्तेत आहोत, तोपर्यंत ही योजना सुरूच राहील, असे फडणवीस यांनी सांगितले. तसेच, दिवाळीची भाऊबीज म्हणून या योजनेचा लाभ भगिनींना मिळत राहील, असा विश्वास त्यांनी व्यक्त केला.

या कार्यक्रमात फडणवीस यांनी फलटणमधील निरा देवधर उपसा सिंचन योजना, औद्योगिक वसाहत विकास आणि सुसज्ज शासकीय रुग्णालय उभारणीबाबत सकारात्मक भूमिका मांडली. त्यांनी फलटण विमानतळाच्या सर्वेक्षणाचेही आश्वासन दिले. त्याचबरोबर, माजी खासदार रणजित निंबाळकर यांच्यावरील आरोपांचा निषेध करत, राजकारणासाठी दुर्दैवी घटनांचा वापर करू नये, असा इशाराही विरोधकांना दिला.