Eknath Shinde : शिंदेंचा भरसभेत थेट उदय सामंत यांना फोन, काय केली विचारणा? म्हणाले मी इथं शब्द देऊ.. नंतर गडबड…
एकनाथ शिंदे यांनी यवतमाळ जिल्ह्यातील पांढरकवडा येथील जाहीर सभेत उद्योगमंत्री उदय सामंत यांना फोन करून एमआयडीसी (महाराष्ट्र औद्योगिक विकास महामंडळ) स्थापन करण्याचे आश्वासन दिले. यामुळे स्थानिक नागरिकांसाठी रोजगाराच्या संधी निर्माण होतील, असे शिंदेंनी सांगितले. सामंत यांनी तात्काळ कारवाईचे आश्वासन दिले.
उपमुख्यमंत्री एकनाथ शिंदे यांनी महाराष्ट्रातील दोन वेगवेगळ्या सभांमध्ये महत्त्वपूर्ण घोषणा करत प्रशासकीय तत्परतेचे दर्शन घडवले. यवतमाळ जिल्ह्यातील पांढरकवडा येथे एका जाहीर सभेत त्यांनी थेट उद्योगमंत्री उदय सामंत यांना फोन केला. ‘उदय सामंतजी मी इथं पांढरकवड्यात सभेत आलोय लोकांची मागणी आहे. इथे रोजगार नाही मिळत इथं एमआयडीसी पाहिजे जागा द्यायला तयार आहे. तर शब्द देऊ मी त्यांना?’ असा सवाल केला असता उदय सामंतांनी द्या नक्की साहेब असं म्हणत सकारात्मक प्रतिसाद दिला. स्थानिक नागरिकांच्या मागणीनुसार, पांढरकवडा येथे एमआयडीसी (महाराष्ट्र औद्योगिक विकास महामंडळ) निर्माण करून रोजगाराच्या संधी उपलब्ध करून देण्याचे आश्वासन शिंदेंनी दिले. तर उदय सामंत यांनी यावर तत्काळ कारवाई करण्याचे मान्य केले.
तर दुसरीकडे वणी येथील सभेतून उपमुख्यमंत्र्यांनी प्रदूषण विभागाच्या अधिकाऱ्यांशी संपर्क साधला. कोळशाच्या प्रदूषणामुळे नागरिकांच्या आरोग्यावर होत असलेल्या परिणामांबद्दल चिंता व्यक्त करत, यावर २४ तासांत कारवाई करण्याचे कठोर निर्देश त्यांनी दिले. अधिकाऱ्यांनीही तात्काळ उपाययोजना करण्याचे आश्वासन दिले.
