Pun ShivSena Protest : पुण्यात शिंदेंच्या सेनेत नाराजीनाट्य, नीलम गोऱ्हे यांच्या घराबाहेर ठिय्या, शिवसैनिक आंदोलकांची मागणी काय?

पुण्यातील नीलम गोर्हे यांच्या निवासस्थानाबाहेर एकनाथ शिंदे गटाच्या शिवसैनिकांनी जोरदार आंदोलन सुरू केले आहे. आगामी निवडणुकांमध्ये जागावाटपावरून निर्माण झालेल्या तीव्र असंतोषातून हे आंदोलन करण्यात येत आहे. शिवसैनिकांची मुख्य मागणी आहे की, पुणे शहरातून त्यांना १६५ जागांवर स्वबळावर निवडणूक लढवण्याची संधी मिळावी. जर युती होत असेल, तर किमान ५० जागा तरी शिवसेनेला मिळायला हव्यात.

आंदोलक शिवसैनिकांच्या म्हणण्यानुसार, जागावाटपाचा निर्णय त्यांना विश्वासात न घेता घेण्यात आला आहे. आठ उमेदवार बाहेरून आलेले आहेत, तर सहा उमेदवार प्रमोदनाना भानगिरे यांच्या कुटुंबातील आहेत. यामुळे पक्षासाठी वर्षानुवर्षे राबणाऱ्या निष्ठावंत पदाधिकाऱ्यांवर अन्याय होत असल्याची भावना कार्यकर्त्यांनी व्यक्त केली. नीलम गोर्हे त्यांच्या नेत्या असून, त्यांच्याकडून न्यायाची अपेक्षा आहे. न्याय मिळेपर्यंत आंदोलन मागे घेणार नाही, अशी भूमिका त्यांनी घेतली आहे. पोलिसांनी घटनास्थळी बंदोबस्त तैनात केला असून, बॅरिकेड्स लावून कार्यकर्त्यांना अडवले आहे.