Pune Politics : मनसेची मविआत एन्ट्री होणार? वज्रमुठ उभारण्यास सोबत हवी.. भाजपविरोधात ठाकरे सेनेचा नवा डाव
पुण्यात महाराष्ट्र नवनिर्माण सेनेच्या महाविकास आघाडीतील प्रवेशाबाबत चर्चा सुरू आहे. आगामी पुणे महानगरपालिका निवडणुकीच्या पार्श्वभूमीवर भाजप आणि महायुतीला रोखण्यासाठी मनसेची साथ हवी, असे उद्धव ठाकरे यांच्या शिवसेनेच्या स्थानिक पदाधिकाऱ्यांचे मत आहे.
पुण्यात महाराष्ट्र नवनिर्माण सेना (मनसे) महाविकास आघाडीमध्ये (मविआ) प्रवेश करणार असल्याची चर्चा सध्या राजकीय वर्तुळात रंगली आहे. आगामी निवडणुकांच्या पार्श्वभूमीवर ही घडामोड महत्त्वाची मानली जात आहे. विशेषतः उद्धव ठाकरे यांच्या नेतृत्वाखालील शिवसेनेच्या कार्यकर्त्यांकडून मनसेला महाविकास आघाडीसोबत घेण्याचा सूर उमटत आहे.
पुण्यामध्ये भाजप आणि महायुतीला प्रभावीपणे आव्हान देण्यासाठी मनसेची साथ आवश्यक आहे, असे ठाकरेंच्या शिवसेनेचे मत आहे. उद्धव ठाकरे यांनी नुकताच पुणे दौरा केला होता. त्यावेळी झालेल्या मेळावे आणि बैठकांमध्ये स्थानिक पदाधिकाऱ्यांनी ही मागणी लावून धरल्याचे सूत्रांनी सांगितले.
आगामी पुणे महानगरपालिकेच्या निवडणुकीच्या दृष्टीने मनसेचा महाविकास आघाडीतील समावेश महत्त्वपूर्ण ठरू शकतो. मनसेसोबत राष्ट्रवादी काँग्रेस (शरदचंद्र पवार गट) आणि काँग्रेस या मित्रपक्षांनाही सोबत घेऊन महायुतीला रोखण्याची रणनीती आखली जात आहे. खासदार संजय राऊत यांनीही यापूर्वी मुंबई महानगरपालिका आणि पुणे महानगरपालिकेच्या संदर्भात अशा युतीचे संकेत दिले होते. यामुळे पुण्यातील राजकीय समीकरणे बदलण्याची शक्यता वर्तवली जात आहे.
