सपकाळांविरोधात लिहिलेल्या पत्रावर राऊतांचा गौप्यस्फोट

काँग्रेसच्या पक्षश्रेष्ठींना कोणतेही पत्र पाठवलेले नसल्याचे शिवसेना (उद्धव बाळासाहेब ठाकरे) नेते संजय राऊत यांनी स्पष्ट केले आहे. काँग्रेसच्या अंतर्गत निर्णयांबाबत बोलताना, केंद्रात चर्चा केल्यानंतर बाळासाहेब थोरात आणि वर्षा गायकवाड यांना शिष्टमंडळात पाठवण्यात आले, असे त्यांनी नमूद केले. माध्यमांनी यावर उगाचच रंगतदार बातम्या देऊ नयेत, असे राऊत म्हणाले.

दादर येथील मनसेच्या दीपोत्सवाला यंदा उद्धव ठाकरे यांना निमंत्रण देण्यात आले आहे. या निमित्ताने दोन भावांच्या एकत्र येण्याने अधिक रंगीत आणि तेजस्वी प्रकाश दिसेल, अशी चर्चा आहे. गुजरातमध्ये मंत्रिमंडळाने मुख्यमंत्री वगळता राजीनामा दिल्याच्या घटनेवर राऊतांनी महाराष्ट्रातही अशा बदलांची गरज असल्याचे सांगितले. महाराष्ट्रामध्ये इतके भ्रष्टाचारी मंत्री बसलेले आहेत, त्यांच्या भ्रष्टाचाराला खतपाणी घातलं जातंय आणि मुख्यमंत्री हतबल आहेत. अशा प्रकारची पत्ते पिसण्याचं काम जर महाराष्ट्रात झालं तर त्याचं महाराष्ट्र स्वागत करेल, असे राऊत म्हणाले.