त्या व्हायरल व्हिडीओनंतर मेधा कुलकर्णी शनिवारवाड्यात दाखल
शनिवार वाड्यात नमाज पठणाचा व्हिडिओ व्हायरल झाल्यानंतर मेधा कुलकर्णी यांनी पुरातत्व विभागाकडून घटनेची सत्यता तपासली. त्यांनी शिववंदना करून जागेचे शुद्धीकरण करण्याचा निर्णय घेतला आणि माघी गणेशोत्सव पुन्हा सुरू करण्याची मागणी केली. ऐतिहासिक स्थळांवर असे प्रकार खपवून घेतले जाणार नाहीत, असा इशाराही त्यांनी दिला.
शनिवार वाड्यात नमाज पठण केल्याचा एक व्हिडिओ समाजमाध्यमांवर व्हायरल झाल्यानंतर, या घटनेने लक्ष वेधून घेतले आहे. या प्रकरणाची माहिती मिळताच, मेधा कुलकर्णी यांनी पुरातत्व विभागाच्या अनुभवी अधिकाऱ्यांशी संपर्क साधून घटनेची सत्यता तपासली. पुरातत्व विभागाने या प्रकाराला दुजोरा दिल्यानंतर, ज्या ठिकाणी नमाज पठण झाले, त्या जागेचे शिववंदना करून शुद्धीकरण करण्याचा निर्णय घेण्यात आला.
यावेळी एकत्र आलेल्या जनसमुदायाला संबोधित करताना, कुलकर्णी यांनी शनिवार वाड्याचे ऐतिहासिक महत्त्व अधोरेखित केले. मराठा साम्राज्याच्या विस्ताराचे प्रतीक असलेला हा वाडा छत्रपती शिवाजी महाराजांच्या हिंदवी स्वराज्याच्या स्थापनेचे स्मरण करून देतो, असे त्या म्हणाल्या. सार्वजनिक आणि ऐतिहासिक स्थळांवर अशा प्रकारे नमाज पठण करून जागा ताब्यात घेण्याचा प्रयत्न खपवून घेतला जाणार नाही, असा इशारा त्यांनी दिला. पूर्वी शनिवार वाड्यात होणारा माघी गणेशोत्सव पुन्हा सुरू करण्याची मागणीही कुलकर्णी यांनी पुरातत्व विभागाकडे केली आहे.
