डोनाल्ड ट्रम्प यांच्या पत्नीनं पुतिन यांना दिली चिठ्ठी, मेलानिया यांनी काय लिहिलं?

अमेरिकेचे राष्ट्राध्यक्ष डोनाल्ड ट्रम्प आणि रशियाचे राष्ट्राध्यक्ष व्लादीमीर पुतिन यांच्यामध्ये अमेरिकेमधील अलास्का येथे महत्त्वाची बैठक झाली. या बैठकीकडे संपूर्ण जगाचं लक्ष लागलं होतं. पुतिन, ट्रम्प भेटीदरम्यान एक काळजाला भिडणारी बातमी समोर आली आहे. रॉयटर्स वृत्तसंस्थेच्या रिपोर्टनुसार जेव्हा ही बैठक पार पडली तेव्हा ट्रम्प यांच्या पत्नी मेलानिया या डोनाल्ड ट्रम्प यांच्यासोबत नव्हत्या, मात्र तरी देखील त्यांना पुतिन यांना काहीतरी सांगायचं होतं. त्यामुळे मग मेलानिया यांनी पुतिन यांच्यासाठी एक चिठ्ठी लिहून डोनाल्ड ट्रम्प यांच्याजवळ दिली. या बैठकीवेळी ट्रम्प यांनी आपल्या खिशातून ही चिठ्ठी काढून स्वत: पुतिन यांना दिली. आता या चिठ्ठीमध्ये नेमकं काय होतं? मेलानिया यांना पुतिन यांना काय सांगायचं होतं? हे आता समोर आलं आहे.

मेलानिया यांनी पुतिन यांना लिहिलेल्या चिठ्ठीमध्ये रशिया आणि युक्रेनमधील मुलांबाबत चिंता व्यक्त केली आहे. व्हाईट हाउसच्या अधिकाऱ्यांनी दिलेल्या माहितीनुसार जेव्हा डोनाल्ड ट्रम्प यांनी पुतिन यांची भेट घेतली तेव्हा या भेटीवेळी तिथे मेलानिया उपस्थित नव्हत्या, मात्र त्यांनी एका चिठ्ठीच्या माध्यमातून रशिया आणि युक्रेनमध्ये सध्या सुरू असलेल्या युद्धाबाबत, त्यांना वाटणारी चिंता पुतिन यांच्यापर्यंत पोहोचवली आहे. पत्रात नेमकं काय लिहिलं होतं, हे व्हाईट हाउसच्या अधिकाऱ्यांनी स्पष्ट केलं नाही, मात्र त्यांनी रशिया आणि युक्रेनमधील मुलांबाबत चिंता व्यक्त केल्याची माहिती समोर येत आहे.

युक्रेनने रशियावर असा आरोप केला आहे की, युद्ध सुरू झाल्यापासून ते आतापर्यंत रशियाकडून हजारो मुलांचं अपहरण करण्यात आलं आहे, या मुलांना रशियानं आपल्या ताब्यात ठेवलं आहे, रशियानं युक्रेनच्या ज्या भूमीवर कब्जा केला आहे, तिथे या मुलांना ठेवण्यात आलं आहे, हे आंतरराष्ट्रीय कायद्याचं उल्लंघन आहे, असं युक्रेननं म्हटलं आहे. संयुक्त राष्ट्राच्या मानवाधिकार कार्यालयाकडून देखील या वृत्ताला दुजोरा देण्यात आला आहे. 2022 पासून युक्रेनमधील मुलांच्या मानवी हक्कांचं उल्लंघन होत असल्याचं संयुक्त राष्ट्रसंघानं म्हटलं आहे.

दरम्यान याच मुद्द्यावर मेलानिया यांनी रशियाचे राष्ट्राध्यक्ष पुतिन यांना एक चिठ्ठी लिहिली, ज्यामध्ये या मुलांच्या भविष्याबद्दल चिंता व्यक्त करण्यात आल्याची माहिती समोर येत आहे. मात्र रशियाकडून यावर असा दावा केला जात आहे की, युद्धामुळे हे मुलं अनाथ झाले आहेत. त्यांचं भविष्य सुरक्षित असावं, या उद्देशानं आम्ही त्यांना त्या क्षेत्रात ठेवत आहोत, आता आंतरराष्ट्रीय स्थरावर देखील हा मुद्दा चांगलाच तापला आहे.