Maharashtra Election News LIVE : पुण्यात तलवारी काढून आणि दगडफेक करत दहशत
Maharashtra Live Updates In Marathi : मुंबई महानगरपालिकेच्या महापौरपदाचा सस्पेन्स अखेर संपला आहे. भाजपच्या नगरसेविका रितू तावडे यांच्या रूपाने तब्बल ४४ वर्षांनंतर मुंबईला भाजपचा महापौर मिळाला आहे. मुंबई भाजप अध्यक्ष अमित साटम यांनी काही दिवसांपूर्वी याची घोषणा दिली आहे.
LIVE NEWS & UPDATES
-
रोहित पवारांच्या मागणीचं अजितदादांच्या पक्षाकडून समर्थन
विमान अपघाताची सखोल चौकशी झाली पाहिजे. रोहित पवार अभ्यासू नेते. चौकशीची मागणी योग्य दिशेने नेण्यासाठी प्रयत्न असं अजितदादांच्या राष्ट्रवादीचे नेते अनिल पाटील यांनी म्हटलं आहे.
-
मुंबई महापालिकेत आज महापौर निवडणूक पार पडणार
मुंबई महापालिकेत आज महापौर निवडणूक पार पडणार. शिवसेना शिंदे गटाचे सर्व नगरसेवक आज महापौर निवडणुकीसाठी उपस्थित राहणार. महापौर निवडणूक झाल्यावरती, शिवसेनेचे सर्व नगरसेवक बाळासाहेब ठाकरे यांच्या पूर्णाकृती असलेल्या पुतळ्याजवळ जाऊन बाळासाहेबांना अभिवादन करणार.
-
-
पुण्यात तलवारी काढून आणि दगडफेक करत दहशत
पुण्यात लोहियानगरमध्ये तलवार काढून आणि दगडफेक करत दहशत. हातात तलवार घेऊन दहशत माजवत असल्याचा व्हिडिओ वायरल. हातात तलवारी आणि दगडफेक करत असल्याचा व्हिडीओ व्हायरल. कशामुळे दगडफेक आणि तलवारी फिरवल्या याचा तपास सुरू. अधिक तपास पोलिस करत आहेत.
-
धाराशिव जिल्हा परिषदेत सत्तासंघर्ष; तानाजी सावंत गटाला वगळून भाजप सत्ता स्थापन करण्याच्या तयारीत
धाराशिव जिल्हा परिषदेच्या अध्यक्षपदाच्या निवडीपूर्वी जिल्ह्यातील राजकीय वातावरण कमालीचे तापले आहे. महायुतीमधील अंतर्गत कलह चव्हाट्यावर आला आहे. नुकत्याच झालेल्या निवडणुकीत भाजपला १९, शिवसेनेला १५ आणि राष्ट्रवादीला (अजित पवार गट) ६ जागा मिळाल्याने कोणत्याही एका पक्षाला स्पष्ट बहुमत मिळालेले नाही. या पार्श्वभूमीवर, शिवसेनेचे नेते आमदार तानाजी सावंत यांच्या गटाचा भाजपच्या संभाव्य अध्यक्षाला विरोध असल्याची चर्चा आहे. परिणामी, तानाजी सावंत गटाला सत्तेतून बाजूला ठेवून शिवसेनेतील दुसऱ्या गटाच्या मदतीने भाजप सत्ता स्थापन करण्याच्या हालचाली करत असल्याची माहिती समोर येत आहे. अनेक सदस्य सहलीवर गेल्याने आणि फोडाफोडीच्या राजकारणामुळे धाराशिव जिल्हा परिषदेत आता भाजप नेमकी कोणाशी हातमिळवणी करणार, याकडे सर्वांचे लक्ष लागले आहे.
-
पुण्यात उच्चभ्रू सोसायटीतील हुक्का पार्लरवर पोलिसांची छापेमारी, 5 जण ताब्यात
पुण्यातील उच्चभ्रू वस्ती म्हणून ओळखल्या जाणाऱ्या सहकार नगर परिसरातील एका सोसायटीत विनापरवाना चालवल्या जाणाऱ्या हुक्का पार्लरवर पोलिसांनी धाड टाकली आहे. सहकारनगर पोलीस ठाण्याच्या पथकाने केलेल्या या कारवाईमुळे परिसरात मोठी खळबळ उडाली आहे. या प्रकरणी हुक्का पार्लरचा मालक आणि कर्मचाऱ्यांसह एकूण पाच जणांविरुद्ध गुन्हा दाखल करण्यात आला असून, घटनास्थळावरून १२,४९५ रुपयांचे साहित्य जप्त करण्यात आले आहे. रहिवासी भागात अशा प्रकारे बेकायदेशीर कृत्य सुरू असल्याने पोलिसांनी आता अशा ठिकाणांवर आपली नजर अधिक कडक केली आहे.
-
-
पुणे महापालिकेची कोंडी; राज्य सरकारकडे तब्बल ३००० कोटींचे अनुदान थकले
राज्य सरकारकडून पुणे महानगरपालिकेला मिळणारे वस्तू व सेवा कर (GST) आणि मुद्रांक शुल्काच्या अधिभारापोटीचे अनुदान मोठ्या प्रमाणावर प्रलंबित असल्याने पालिकेच्या तिजोरीवर ताण पडत आहे. सध्या एकूण ३ हजार ६९ कोटी ४५ लाख रुपयांचे अनुदान शासनाकडून येणे बाकी आहे. हा मोठा निधी अडकल्याने शहराच्या नियोजित विकासकामांवर त्याचा परिणाम होण्याची शक्यता निर्माण झाली आहे. या पार्श्वभूमीवर, महापालिका आयुक्त नवल किशोर राम यांनी प्रलंबित अनुदान तातडीने मिळावे यासाठी राज्य सरकारकडे पत्रव्यवहार करत जोरदार पाठपुरावा सुरू केला आहे.
-
जळगाव पोलीस शिपाई पदासाठी भरतीचा थरार सुरू, १७१ जागांसाठी मैदानी चाचणीला प्रारंभ
जळगाव जिल्हा पोलीस दलातील १७१ रिक्त पदांसाठीच्या पोलीस शिपाई भरती प्रक्रियेला आजपासून सुरुवात झाली आहे. यामध्ये ११८ पुरुष आणि ५३ महिला पदांचा समावेश असून, पोलीस कवायत मैदानावर पहाटे ५ वाजेपासूनच उमेदवारांनी गर्दी केली होती. यंदाच्या भरतीचे मुख्य आकर्षण म्हणजे पारदर्शकता वाढवण्यासाठी प्रथमच उंची आणि छाती मोजण्यासाठी डिजिटल तंत्रज्ञानाचा वापर केला जात आहे. संपूर्ण मैदान सीसीटीव्हीच्या निगराणीखाली असून प्रत्येक हालचालीचे चित्रीकरण केले जात आहे. दररोज ५०० उमेदवारांची शारीरिक आणि मैदानी चाचणी घेतली जाणार असून, पुढील नऊ दिवसांत ही सर्व प्रक्रिया पूर्ण करण्याचे नियोजन पोलीस प्रशासनाने केले आहे.
-
-
पुणे जिल्हा परिषदेत महिलाराज, नव्या-जुन्या चेहऱ्यांसह 42 महिला सदस्य विजयी
पुणे जिल्ह्याच्या राजकारणात एक ऐतिहासिक बदल पाहायला मिळत असून नगरपंचायत आणि महापालिकांनंतर आता पुणे जिल्हा परिषदेतही महिलाराज अवतरले आहे. जिल्हा परिषदेच्या एकूण ७३ गटांपैकी तब्बल ४२ गटांमध्ये महिला उमेदवारांनी विजय मिळवला आहे. पुरुषांची संख्या ३१ पर्यंत मर्यादित राहिली आहे. बदलत्या आरक्षण सोडतीमुळे अनेक दिग्गज पुरुष सदस्यांची संधी हुकल्याने त्यांनी आपल्या कुटुंबातील महिलांना निवडणुकीच्या रिंगणात उतरवले होते. या आरक्षित जागांमुळे आणि मतदारांच्या कौलामुळे जिल्हा परिषदेत प्रथमच महिलांचे वर्चस्व निर्माण झाले आहे. निवडून आलेल्या ४२ महिलांमध्ये अनुभवी नेत्यांसह अनेक तरुण आणि उच्चशिक्षित चेहऱ्यांचा समावेश असल्याने जिल्हा परिषदेच्या कारभारात आता महिलांची छाप दिसणार आहे.
-
राज्यात कॉपीमुक्त अभियानाचा फज्जा; बारावीच्या पहिल्याच पेपरला 42 विद्यार्थी सापडले
महाराष्ट्र राज्य माध्यमिक व उच्च माध्यमिक शिक्षण मंडळाच्या वतीने घेण्यात येणाऱ्या बारावीच्या परीक्षेला मंगळवारपासून सुरुवात झाली, मात्र पहिल्याच दिवशी सरकारच्या कॉपीमुक्त अभियानाचे धिंडवडे निघाल्याचे पाहायला मिळाले. इंग्रजी विषयाच्या पहिल्याच पेपरमध्ये राज्यभरात एकूण ४२ विद्यार्थी कॉपी करताना पकडले गेले आहेत. यामध्ये सर्वाधिक २२ प्रकरणे अमरावती विभागात, तर पुणे विभागात १० प्रकरणांची नोंद झाली आहे.
-
पुरंदर विमानतळासाठी ६००० कोटींचा निधी मंजूर; राज्य मंत्रिमंडळाची मान्यता
पुणे जिल्ह्यातील पुरंदर येथील बहुप्रतीक्षित छत्रपती संभाजी राजे आंतरराष्ट्रीय विमानतळाच्या कामाला आता मोठी गती मिळणार आहे. या प्रकल्पाच्या भूसंपादनासाठी ६००० कोटी रुपयांचे कर्ज ‘हुडको’कडून (HUDCO) घेण्यास राज्य मंत्रिमंडळाने महत्त्वपूर्ण मंजुरी दिली आहे. विशेष म्हणजे, या प्रकल्पासाठी ९६ टक्के शेतकऱ्यांनी आपली जमीन देण्यास संमती दर्शवली आहे. १ जूनपर्यंत भूसंपादनाची प्रक्रिया सामंजस्याने पूर्ण करण्याचा सरकारचा मानस आहे. तसेच, विमानतळाच्या जलद विकासासाठी एक विशेष हेतू कंपनी (SPV) आणि स्वतंत्र प्राधिकरण स्थापन करण्यावरही मंत्रिमंडळाने शिक्कामोर्तब केले आहे. ज्यामुळे या आंतरराष्ट्रीय प्रकल्पातील अडथळे दूर झाले आहेत.
-
मिरा-भाईंदरमध्ये मद्यधुंद कार चालकाचे नियंत्रण सुटले; कार डिव्हायडरला धडकून उलटली
मिरा-भाईंदर शहरात ओल्ड पेट्रोल पंप परिसरात एका मद्यधुंद कार चालकाने भीषण अपघात घडवून आणल्याने खळबळ उडाली आहे. कार चालकाचे वाहनावरील नियंत्रण सुटल्याने भरधाव कार थेट उड्डाणपुलाच्या कामासाठी उभारण्यात आलेल्या डिव्हायडरला जाऊन धडकली. ही धडक इतकी जोरदार होती की कार रस्त्यावरच पलटी झाली. प्राथमिक माहितीनुसार, चालक मद्यधुंद अवस्थेत असल्याने हा अपघात घडला असून, सुदैवाने यात कोणतीही जीवितहानी झाल्याचे वृत्त अद्याप समोर आलेले नाही. पोलिसांनी घटनास्थळी धाव घेत तपास सुरू केला आहे.
मुंबई महानगरपालिकेच्या महापौरपदाचा सस्पेन्स अखेर संपला आहे. भाजपच्या नगरसेविका रितू तावडे यांच्या रूपाने तब्बल ४४ वर्षांनंतर मुंबईला भाजपचा महापौर मिळाला आहे. मुंबई भाजप अध्यक्ष अमित साटम यांनी काही दिवसांपूर्वी याची घोषणा दिली आहे. आज मुंबई महापालिका महापौरपदाची निवडणूक पार पडणार आहे. ही निवडणूक बिनविरोध होणार आहे. तर उपमहापौरपदी शिवसेना शिंदे गटाचे संजय घाडी यांची वर्णी लागली आहे. या निवडीमुळे मुंबई महापालिकेवर आता महायुतीची सत्ता अधिकृतपणे प्रस्थापित होणार आहे. प्रशासकीय राजवट संपवून लोकप्रतिनिधींचे राज्य पुन्हा सुरू झाल्याने मुंबईच्या राजकारणात आज एक नवा अध्याय लिहिला गेला आहे. यासह राज्य, देश-विदेशातील अपडेट्स जाणून घेण्यासाठी हा ब्लॉग फॉलो करा.
Published On - Feb 11,2026 8:02 AM
