Rohit Pawar: नाना पटोलेंशी गुप्त भेट, रोहित पवार काँग्रेसच्या वाटेवर? भाजपच्या या बड्या नेत्याचा दावा, मग पवारांचं उत्तर काय?

गजानन उमाटे, प्रतिनिधी, टीव्ही 9 मराठी: शरदचंद्र पवार राष्ट्रवादी काँग्रेसचे आमदार रोहित पवार हे काँग्रेसच्या वाटेवर असल्याचा दावा विदर्भातील भाजपचे आमदार परिणय फुके यांनी केला आहे. इतकेच नाही तर रोहित पवार यांनी काँग्रेस नेते नाना पटोले यांची गुप्त भेट घेतल्याचा दावाही त्यांनी केला. त्यावर पूर्व विदर्भाच्या दौऱ्यावर असताना पवार यांनी टीका केली आहे. त्यांनी या आरोपांना प्रत्युत्तर दिले आहे. काय म्हणाले फुके आणि त्याला काय दिलं रोहित पवार यांनी उत्तर?

रोहित पवार काँग्रेसच्या वाटेवर

राष्ट्रवादीचे आमदार रोहित पवार आणि नाना पेटोल यांच्यात गुप्त भेट झाली. पवार हे काँग्रेसच्या वाटेवर आहेत. खासदार सुप्रिया सुळे यांच्यामुळे रोहित पवार यांना डावललं जात आहेत, त्यामुळे ते काँग्रेसच्या वाटेवर आहेत, असा दावा भाजप आमदार परिणय फुके यांनी केला आहे. पवार आणि सुळे यांच्यात मतभेद आहेत. त्यामुळेच ते काँग्रेस पक्षात प्रवेश करण्याच्या तयारीत असल्याचे फुके म्हणाले.

मनोज जरांगे यांच्यावर टीका

मनोज जरांगे पाटील बालहट्ट करत आहेत. जरांगे पाटील यांच्या गिधड धमकीला कोणी घाबरत नाही, असे भाजप आमदार परिणय फुके म्हणाले. संविधानाच्या चौकटीबाहेर जाऊन हट्ट करणे चुकीचे आहे. जरांगे पाटील यांची लोकप्रियता खालावली आहे. ते वैफल्यग्रस्त झाले आहेत. त्यामुळेच ते मंत्र्यांना, आमदारांना शिवीगाळ करत आहेत, असा आरोप फुके यांनी केला.

माझी काळजी करू नका

माझ्याबद्दलची काळजी तुम्ही करू नका. परिणय फुके हे मुख्यमंत्री देवेंद्र फडणवीस यांचे निकटवर्ती आहेत. ती जवळीक फुके कशासाठी वापरतात, तर विरोधी कार्यकर्त्यांविरोधात एखादी खोटी केस दाखल करण्यासाठी वापरता असा आरोप आमदार रोहित पवार यांनी केला. या भागात भाजपच्या कार्यकर्त्यांचा वाळूचा व्यवसाय आहे, तो निवांत चालावा यासाठी या पदाचा वापर करता. धानाची खरेदी कशी करावी यासाठी मुख्यमंत्र्यांनी एक समिती नेमली होती. त्यासाठी तुम्ही छत्तीसगडला गेला. त्या ठिकाणी तुम्ही झाडाझुडपात फिरून आला का? का भजी खाऊन आलात? तिथे 3500 रुपये धान खरेदी होते, तर इथं 2300 रुपये भाव दिल्या जातो असे रोहित पवार म्हणाले.