Maharashtra News LIVE : ऊर्जा, पूजा, शरीरशांती आणि…, भोंदू अशोक खरातच्या तक्रारींचा आकडा वाढला

जळगाव – अमेरिका – इराण मध्ये सीझफायर घोषित होताच सोन्याच्या आणि चांदीच्या दरात मोठी वाढ

जळगाव – अमेरिका – इराण मध्ये सीझफायर घोषित होताच सोन्याच्या आणि चांदीच्या दरात मोठी वाढ झाली आहे.  सोन्याच्या दरात 3 हजार रूपयांनी तर चांदीचा दरातही 10 हजार रुपयांची वाढ झाली आहे.  सोन्याचे दर जीएसटीसह 1 लाख 56 हजार 45 रुपयांवर पोहोचले असून चांदीचे दर जीएसटीसह 2 लाख 54 हजार 410 रुपये इतके आहेत.

चंद्रपूर :- गॅस टंचाईचा भास, चंद्रपुरात रांगांचा गोंधळ, बाऊन्सर तैनान

इराण-इराक-अमेरिका संघर्षाच्या पार्श्वभूमीवर गॅस पुरवठ्यावर परिणाम होण्याची भीती व्यक्त होत असताना चंद्रपूर शहरात नागरिकांची मोठी गर्दी पाहायला मिळत आहे.  शहरातील अनेक गॅस एजन्सीसमोर सकाळपासूनच लांबलचक रांगा लागत असून परिस्थिती नियंत्रणात ठेवण्यासाठी काही ठिकाणी खासगी बाऊन्सरही तैनात करण्यात आले आहेत. घरपोच गॅस पुरवठा सुरू असतानाही नागरिकांमध्ये घबराटीचे वातावरण दिसत आहे.

बीड – सुनेत्रा पवार यांच्या जीवितास आणि प्रतिष्ठेस धोका असल्याच्या उल्लेखाचे निनावी पत्र व्हायरल.

बीड –  राष्ट्रवादी काँग्रेस पार्टीच्या बीड जिल्हाध्यक्षा प्रज्ञा खोसरे या भोंदू खरातच्या हस्तक असून त्यांच्यापासून सुनेत्रा पवार यांच्या जीवितास आणि प्रतिष्ठेस धोका असल्याच्या उल्लेखाचे एक निनावी पत्र सोशल माध्यमांवर मोठ्या प्रमाणात व्हायरल होत आहे. यामुळे बीडच्या राजकीय वर्तुळासह सर्वत्र या संदर्भात उलट सुलट चर्चा होत आहेत.

चंद्रपूर : मित्राच्या लग्नात डीजेच्या तालावर नाचताना तरुणाचा हृदयविकाराच्या झटक्याने मृत्यू

चंद्रपूर :- मित्राच्या लग्नात डीजेच्या तालावर नाचताना एका तरुणाचा हृदयविकाराच्या झटक्याने अचानक मृत्यू झाल्याची दुर्दैवी घटना चंद्रपूर जिल्ह्यात समोर आली आहे.  अल्पेश दहागावकर असं 25 वर्षीय मृत तरुणाचं नाव आहे.

अल्पेश लग्नाच्या कार्यक्रमात डीजेच्या तालावर नाचतांना अचानक खाली कोसळला.  सुरुवातीला कोणालाही हे लक्षात आलं नाही,  मात्र काही वेळातच तो प्रतिसाद देत नसल्याचे पाहून त्याला गोंडपिपरी येथील सामान्य रुग्णालयात दाखल करण्यात आलं.  तेथे डॉक्टरांनी तपासणी करून त्याला मृत घोषित केलं.

सोलापुरातील अवंती नगरमध्ये दुचाकीवरून येत चेन स्नॅचिंगचा प्रकार

वॉकिंग करत असताना वृद्ध महिलेच्या गळ्यातील साडेतीन तोळ्याचे सोन्याचे गंठण चोरट्यांनी लांबवले. विजयालक्ष्मी सावळे असे यां पिडीत महिलेचे नाव आहे. दरम्यान घटनेची माहिती मिळताच सोलापूर पोलिसांच्या 15 टीम चोरट्यांच्या शोधासाठी रवाना झाल्यात.

भोंदू अशोक खरातला आज न्यायालयात हजर केलं जाणार

भोंदू अशोक खरातला आज न्यायालयात हजर केलं जाणार. पहिल्या गुन्ह्यातील पोलीस कोठडी आज संपणार आहे. पुढील गुन्ह्यात पुन्हा ताबा मागण्याची शक्यता आहे.  SIT ने कालच्या प्रेस कॉन्फरन्समध्ये तपासातील महत्त्वाचे खुलासे केले. सुरक्षा कारणास्तव मागील सुनावणी  ऑनलाईन झाली होती. आजही ऑनलाईन सुनावणी होण्याची शक्यता असल्याची सूत्रांनी माहिती दिली आहे.  खरात प्रकरणाकडे राज्यभराचं लक्ष लागलं आहे.

वाकड – म्हातोबानगर परिसरात महापालिकेची अतिक्रमण निर्मूलन मोहीम

चिंचवड महापालिकेच्या झोपडपट्टी निर्मूलन व पुनर्वसन विभागाने विकास आराखड्यात आरक्षित असलेल्या वाकड-म्हातोबानगर येथील २४ मीटर डिपी रस्त्यावरील १५०० चौरस मीटर जागेवरील ४१ अनधिकृत झोपड्या तसेच बांधकामांवर निष्कासनाची कारवाई केली. महापालिका स्थापत्य, झोपडपट्टी निर्मूलन व पुनर्वसन विभाग, प्रशासन व स्थापत्य, शहरी दळणवळण विभाग, नगररचना विभाग, विद्युत विभाग, अतिक्रमण विभाग, अग्निशामक व महाराष्ट्र सुरक्षा बलाचे जवान यांनी संयुक्तपणे ही कारवाई केली.

पिंपरी चिंचवड : उघड्यावर कचरा टाकणाऱ्यांना दणका; ५४३५ नागरिकांकडून सव्वा कोटी दंड वसूल 

पिंपरी-चिंचवड शहरात उघड्यावर कचरा टाकणाऱ्यांवर महापालिकेने कारवाईचा बडगा उगारला आहे. वर्षभरात ५ हजार ४३५ नागरिकांवर कारवाई करण्यात आली असून, त्यांच्याकडून एक कोटी १५ लाख ८८ हजार रुपयांचा दंड वसूल करण्यात आला. मध्य प्रदेशातील इंदूर शहराच्या धर्तीवर शहर कचराकुंडीमुक्त करण्याचे प्रयत्न महापालिकेच्या वतीने सुरू आहेत. शहरातील सर्व ठिकाणच्या कचराकुंड्या हटविण्यात आल्या आहेत. ओला व सुका कचरा वेगवेगळा करून देण्याबाबत एका संस्थेची नियुक्ती करण्यात आली असून, स्वयंसेवक नागरिकांमध्ये जनजागृती करत आहेत.

कल्याण रेल्वे स्कायवॉक बनला फेरीवाल्यांचा अड्डा; प्रवाशांना चालायलाही जागा नाही

कल्याण रेल्वे स्कायवॉक बनला फेरीवाल्यांचा अड्डा; प्रवाशांना चालायलाही जागा नाही… गर्दीत चेंगराचेंगरीची भीती वाढली; सुरक्षेचा गंभीर प्रश्न ऐरणीवर आला आहे. रेल्वे आणि KDMC चे दुर्लक्ष उघड; संतप्त प्रवाशांची तातडीच्या कारवाईची जोरदार मागणी होत आहे.

पिंपरी-चिंचवडकरांनो पाणी जपून वापरा! पवना धरणात जूनपर्यंत पुरेल इतकाच पाणीसाठा

कडक उन्हाळा आणि वाढत्या मागणीमुळे पिंपरी- चिंचवड शहराची जीवनवाहिनी असलेल्या पवना धरणातील पाणीसाठा झपाट्याने कमी होऊ लागला आहे. नोंदवलेल्या आकडेवारीनुसार, धरणात आता केवळ ४६.५५ टक्के पाणीसाठा शिल्लक आहे. हा साठा जून अखेरपर्यंत म्हणजेच पावसाळ्याच्या आगमनापर्यंत शहराला पुरेल इतकाच असल्याने, नागरिकांनी पाण्याचा वापर काटकसरीने करण्याचे आवाहन महापालिका प्रशासनाने केले आहे. पिंपरी चिंचवड शहराला मुख्यत्वे मावळ तालुक्यातील पवना धरणातून पाणीपुरवठा केला जातो. महापालिका दररोज रावेत येथील बंधाऱ्यातून ५२० एमएलडी पाणी उचलते. याव्यतिरिक्त: एमआयडीसी: शहराच्या काही भागांसाठी ३० एमएलडी पाणी उपलब्ध करून दिले जात आहे.

गोरेगाव पूर्वेकडील रहेजा हाइट्स येथे दिसलेल्या बिबट्याला पकडण्यासाठी वन विभागाने लावला पिंजरा

मुंबईतील गोरेगाव पूर्व, दिंडोशी येथील रहेजा हाइट्समध्ये बिबट्या वारंवार दिसल्याने रहिवाशांमध्ये भीतीचे वातावरण आहे. काल रात्रीसुद्धा एक बिबट्या या हाईप्रोफाइल सोसाइटीच्या पार्किंग लॉटमध्ये शिरला आणि तिथे उभ्या असलेल्या एका कुत्र्यावर हल्ला केला. त्यानंतर सोसायटीमध्ये भीतीचे वातावरण निर्माण झाले आहे, लोक आपल्या मुलांना सोसायटीमध्ये खाली एकटे सोडत नाहीत. या सोसायटीमध्ये राहणाऱ्या लोकांनी टीव्ही9 च्या माध्यमातून सरकारी प्रशासनाकडे बिबट्याला पकडण्याचे आवाहन केले होते, त्यानंतर वन विभागाच्या कर्मचाऱ्यांनी रात्री उशिरा एक पिंजरा लावला.