Priya Marathe: कॅन्सरने तिचं शरीर…; प्रिया मराठेच्या निधनानंतर प्रार्थना बेहेरे झाली भावूक, लिहिली खास पोस्ट
Priya Marathe Death: अभिनेत्री प्रिया मराठेच्या निधनानंतर अभिनेत्री प्रार्थना बेहेरे भावूक झाली आहे. तिने सोशल मीडियावर प्रियाचे काही खास फोटो शेअर करत पोस्ट लिहिली आहे. प्रार्थना काय म्हणाली वाचा...
अभिनेत्री प्रिया मराठेचे 31 ऑगस्ट रोजी पहाटे निधन झाले. गेल्या काही दिवसांपासून ती कर्करोगाशी झुंज देत होती. काल, वयाच्या 38व्या वर्षी तिने मीरा रोड येथील घरात अखेरचा श्वास घेतला. तिच्या निधनाने सर्वांनाच धक्का बसला आहे. प्रियाची जवळची मैत्रिण प्रार्थना बेहेरेने सोशल मीडियावर एक पोस्ट शेअर केली आहे.
1 / 6
प्रार्थनाने तिच्या अधिकृत इन्स्टाग्राम अकाऊंटवर प्रियाचे काही फोटो शेअर केले आहेत. हे फोटो शेअर करत ती भावूक झाल्याचे दिसत आहे. प्रिया आणि प्रार्थना या काही काळ एकाच घरात रहात होत्या. तिच्या आठवणीत प्रार्थनाला अश्रू अनावर झाले आहेत.
2 / 6
"प्रिया , पियू , परी , प्री , ती माझ्यासाठी फक्त एक सहकलाकार नव्हती, ती माझ्या अतिशय जिव्हाळ्याच्याची मैत्रीण होती. माझी वेडे... आम्ही एकत्र घर शेअर केलं होतं. कितीतरी वेळा आम्ही तासन्तास बोलत बसायचो… मॅगी, भुर्जी, कॉफी… हे सगळं आमचं छोटंसं जग होतं. खूप साऱ्या गप्पा, काहीसं वेडं हसणं, रात्री उशिरा पर्यंत जागणं – त्या क्षणांना काही तोड नाही" असे प्रार्थना म्हणाली.
3 / 6
पुढे तिने पोस्टमध्ये लिहिले की, "ती माझी इंडस्ट्रीतील पहिली मैत्रीण होती – आणि खरी सख्खी मैत्रीण. तिच्यामुळेच हे नवीन जग मला आपलंसं वाटलं. तिच्यासोबतच मी स्वतःला शोधलं, हसावं, रडावं आणि मोकळं व्हावं असं वाटलं. अभिनयाच्या सुरुवातीच्या दिवसांत जेव्हा सर्व काही नवीन, अनोळखी आणि वाटायचं, तेव्हा तिचं हसतं मुख, तिचं प्रेमळ बळ माझ्यासोबत होतं. तिच्यासोबत मी पहिला सीन केला, पहिल्यांदा camera शेअर केला , ती इतकी हसमुख , प्रामाणिक, भावनाशील आणि जिव्हाळ्याने भरलेली व्यक्ती होती की तिच्यासोबत क्षणभरही घालवला, तरी तो कायमचा लक्षात राहिला."
4 / 6
"कॅन्सरशी लढा देत असताना, एक वेळ अशी आली होती की तिची तब्येत थोडीशी सुधारली. तेव्हा ती माझ्या अलिबागच्या घरी आली होती. मी, ती आणि शाल्मली — आम्ही तिघींनी एकत्र इतका सुंदर वेळ घालवला की तो क्षण कायमचा मनात कोरला गेला आहे. ती खूप आनंदी होती… तेव्हा तिने मला एका शांत स्वरात म्हटलं, तुझं घर, तुझं वातावरण, तुझे हे कुत्रे… हे सगळं मला बरे करतंय. मला इथे येऊन बरं वाटतंय… जणू काही हे ठिकाणच मला heal करतंय."
5 / 6
शेवटी प्रार्थना म्हणाली, "कॅन्सरने तिचं शरीर झिजवलं, पण तिचं मन, तिचा आत्मा, तिचं खंबीरपणं – ते कोणतंही आजार हरवू शकला नाही. शेवटच्या क्षणापर्यंत तिने जगायला आणि हसवायला शिकवलं. ती गेली, पण तिच्या आठवणी, तिचं हास्य, तिचं अभिनयातलं तेज — सगळं अजूनही माझ्यासोबत आहे. माझ्या आयुष्याचा एक भाग तिच्यासोबतच गेला आणि तो भाग मी जपून ठेवणार आहे.. कायमचा."
