Mutton Biryani : एकदा खाल तर पुन्हा पुन्हा खावंसं वाटेल! मऊ, रसरशीत मटण बिर्याणी कशी करावी? जाणून घ्या सोप्या ट्रिक्स
मऊ, लुसलुशीत आणि मसाल्यांनी भरलेली रसरशीत मटण दम बिर्याणी खाण्याची मजा काही औरच! आता हीच हॉटेलसारखी चव घरच्या घरी अनुभवता येणार आहे. सगळ्यांना आवडेल अशी मटण बिर्याणी, त्यासाठी लागणारं साहित्य आणि रेसिपी हवी असेल तर पटकन खालील माहिती वाचा आणि लगेच मटण बिर्याणी करायला घ्या.
साहित्य: ७५० ग्रॅम मटण, १ कप / १५० ग्रॅम दही, १ मोठा चमचा बिर्याणी मसाला, १ चमचा गरम मसाला, १ मोठा चमचा लाल तिखट, १/२ चमचा हळद, १ मोठा चमचा धनेपूड, ३-४ उभ्या चिरलेल्या हिरव्या मिरच्या, थोडी पुदिन्याची पाने, बारीक चिरलेली कोथिंबीर, १ मोठा चमचा आले-लसूण पेस्ट, १ चमचा मीठ, २ कांदे (उभे कापलेले), चवीनुसार मीठ, २५० ग्रॅम बारीक चिरलेला कांदा, ३ मोठा चमचे तेल, १ मोठा चमचा बिर्याणी मसाला, १ मोठा चमचा धनेपूड, १ चमचा गरम मसाला, १ मोठा चमचा लाल तिखट, चवीनुसार मीठ, १ कप गरम पाणी, २ कप / ४०० ग्रॅम बासमती तांदूळ, ६ कप पाणी, १ मोठा चमचा मीठ, २ तमालपत्र, १ काळी वेलची, १ लहान दालचिनी तुकडा, ४-५ लवंगा, ४-५ काळी मिरी, हळदीचे पाणी, २-३ टेबलस्पून तूप
1 / 6
१. मटण मॅरिनेट करण्यासाठी: मटण स्वच्छ धुऊन घ्या. त्यात दही, बिर्याणी मसाला, गरम मसाला, लाल तिखट, हळद, धणेपूड, हिरव्या मिरच्या, पुदिन्याची पाने, कोथिंबीर, आलं-लसूण पेस्ट आणि चवीनुसार मीठ घाला. सर्व साहित्य मटणाला चांगले लावून घ्या. मटण किमान १ ते २ तास किंवा शक्य असल्यास रात्रभर फ्रिजमध्ये मुरत ठेवा.
2 / 6
२. कांदा तळण्यासाठी: कांद्याच्या पातळ चकत्या करून त्यात थोडे मीठ घाला. कांदा ३० ते ४५ मिनिटे बाजूला ठेवा. त्यातील पाणी हाताने पिळून काढा. कांदा स्वच्छ कापडावर किंवा टिश्यू पेपरवर पसरवून त्यातील ओलावा काढा. पंख्याखाली किंवा उन्हातही वाळवू शकता. कढईत तेल गरम करून बारीक चिरलेला कांदा सोनेरी होईपर्यंत तळा. दुसऱ्या पॅनमध्ये तेल गरम करून पातळ चिरलेला कांदा कुरकुरीत आणि गडद सोनेरी होईपर्यंत तळा. तळलेला कांदा बाहेर काढून ठेवा. यालाच बिर्याणीचा बरिस्ता म्हणतात.
3 / 6
३. मटण शिजवण्यासाठी: कुकरमध्ये कांदा तळलेले उरलेले तेल घाला. त्यात सोनेरी केलेला कांदा घालून बिर्याणी मसाला, धणेपूड, गरम मसाला, लाल तिखट आणि मीठ घाला. आता मॅरिनेट केलेले मटण घालून मसाला मटणाला चांगला लागेपर्यंत परतून घ्या. त्यात गरम पाणी घालून मिक्स करा. कुकरचे झाकण लावून मध्यम आचेवर साधारण ४ शिट्ट्या होईपर्यंत मटण शिजवा.
4 / 6
४. भात शिजवण्यासाठी: तांदूळ स्वच्छ धुऊन ३ ते ४ वेळा पाणी बदला, तांदूळ ३० मिनिटे पाण्यात भिजत ठेवा. एका मोठ्या पातेल्यात पाणी गरम करा. त्यात मीठ, तमालपत्र, काळी वेलची, दालचिनी, लवंग आणि काळी मिरी घाला. भिजवलेले तांदूळ पाण्यातील पाणी काढून उकळत्या पाण्यात घाला. मोठ्या आचेवर साधारण ७ ते ८ मिनिटे शिजवा. भात ९० टक्के शिजला की गॅस बंद करून भाताचे पाणी गाळून घ्या.
5 / 6
५. बिर्याणीला दम देण्यासाठी: शिजलेल्या मटणावर भाताचा थर समान पसरवा. त्यावर हळदीचे पाणी, बिर्याणी मसाला, कोथिंबीर आणि पुदिन्याची पाने घाला. त्यावर तूप आणि भात शिजवलेल्या पाण्याचे २ ते ३ पळी पाणी घाला. हळदीच्या पाण्याऐवजी केशराचे पाणीही वापरू शकता. तूप घालणे ऐच्छिक आहे. आवडत नसल्यास टाळू शकता. कुकरचे झाकण ठेवून, पण लॉक न करता, मंद आचेवर १५ मिनिटे बिर्याणीला दम द्या. गॅस बंद केल्यानंतर आणखी ५ मिनिटे बिर्याणी तशीच राहू द्या. मऊ, रसरशीत मटण दम बिर्याणी तयार! गरमागरम मटण दम बिर्याणी रायत्यासोबत किंवा सॅलडसोबत सर्व्ह करा.
