CM Fadnavis : भाजपच्या स्थानिक युतींवरून गदारोळ अन् तात्काळ BJP चा रिव्हर्स गिअर, फडणवीसांचे थेट आदेश

अकोला आणि अंबरनाथ नगरपरिषदांमध्ये भारतीय जनता पक्षाने (भाजप) केलेल्या स्थानिक युतीमुळे महाराष्ट्राच्या राजकारणात मोठी खळबळ उडाली आहे. अकोला नगरपालिकेत भाजपने एमआयएमसोबत तर अंबरनाथमध्ये काँग्रेस आणि अजित पवारांच्या राष्ट्रवादी काँग्रेससोबत सत्ता स्थापन केली. या अभद्र युतीवरून विरोधकांनी भाजपवर जोरदार टीका केली. अकोट नगरपालिकेत कोणत्याच पक्षाला स्पष्ट बहुमत मिळाले नव्हते. त्यामुळे अकोट विकास मंचच्या माध्यमातून भाजप, एमआयएम, ठाकरे गट, शिंदे गट, राष्ट्रवादी काँग्रेस (अजित पवार), राष्ट्रवादी काँग्रेस (शरद पवार) आणि बच्चू कडूंनी एकत्र येत सत्ता स्थापन केली.

तर, अंबरनाथमध्ये शिंदे गटाला सर्वाधिक जागा मिळूनही, भाजपने त्यांना बाजूला ठेवून काँग्रेस आणि अजित पवारांच्या राष्ट्रवादीला सोबत घेतले. या युतींवरून राजकीय गदारोळ वाढल्यानंतर, राज्याचे मुख्यमंत्री देवेंद्र फडणवीस यांनी कठोर भूमिका घेतली. त्यांनी स्पष्ट केले की, भाजप अशा कोणत्याही युतींना मान्यता देत नाही आणि एमआयएम व काँग्रेससोबतच्या या युती तात्काळ तोडण्याचे आदेश दिले. स्थानिक पातळीवर केलेल्या या चुकीच्या युतींसाठी कारवाई केली जाईल, असेही फडणवीस यांनी नमूद केले. या आदेशानंतर एमआयएमने अकोट विकास मंचमधून बाहेर पडण्याची घोषणा केली, तर अंबरनाथमधील काँग्रेस नगरसेवकांनी पक्षनेतृत्वाचा आदेश झुगारून भाजपमध्ये सामील होण्याची तयारी दर्शवली आहे.