Maharashtra CM : जनतेच्या मनातील मुख्यमंत्री कोण? शिंदे की फडणवीस? खोतकर अन् दरेकरांमध्ये जुंपली

सध्या महाराष्ट्रात मुख्यमंत्रिपदावरून सुरू असलेल्या चर्चेने राजकीय वातावरण तापले आहे. जालना येथील भाषणात आमदार अर्जुन खोतकर यांनी “खरे मुख्यमंत्री एकनाथ शिंदे” असे विधान केले. या विधानाला प्रत्युत्तर देताना प्रवीण दरेकर यांनी म्हटले की, “आपला नेता मुख्यमंत्री व्हावा किंवा आमच्या मनातले असं बोलणं गैर नाही.” मात्र, दरेकरांनी महाराष्ट्रातील जनतेच्या मनातील खरे मुख्यमंत्री देवेंद्र फडणवीस असल्याचे ठामपणे सांगितले. ते म्हणाले, “आज तरी महाराष्ट्राचे मुख्यमंत्री हे देवेंद्र फडणवीस साहेब आहेत आणि तेही महाराष्ट्राच्या जनतेच्या मनातले मुख्यमंत्री आहेत.” दरेकर यांनी स्पष्ट केले की, पक्षीय कार्यकर्ता आपल्या नेतृत्वाविषयी अशा भावना व्यक्त करत असतो, परंतु महाराष्ट्रातील प्रत्येक माणसाच्या मनात देवेंद्र फडणवीस यांनी स्थान निर्माण केले आहे. त्यामुळे “जनतेच्या मनातला मुख्यमंत्री हे माननीय देवेंद्र फडणवीस साहेब हेच आहेत, ही वस्तुस्थिती आहे,” असे दरेकरांनी अधोरेखित केले.