Gautami Patil : गौतमी पाटीलला क्लीन चिट, अपघात प्रकरणी मोठी अपडेट; ड्रायव्हरवर गुन्हा दाखल
पुणे पोलिसांनी गौतमी पाटीलला एका अपघात प्रकरणात क्लीन चिट दिली आहे. अपघाताच्या वेळी ती गाडीत नव्हती. रिक्षाला धडक दिल्याप्रकरणी वाहन चालकावर गुन्हा दाखल करण्यात आला असून, पोलीस तपास सुरू आहे. वाहन जप्त करून आरटीओ तपासणी करण्यात आली आहे.
गौतमी पाटीलला पुणे पोलिसांनी एका अपघात प्रकरणात क्लीन चिट दिली आहे. अपघात घडला त्यावेळी गौतमी पाटील संबंधित गाडीमध्ये उपस्थित नव्हती, अशी माहिती पोलिसांनी दिली आहे. एका रिक्षाला धडक दिल्याप्रकरणी चालकावर गुन्हा दाखल करण्यात आला आहे. सिंहगड रोड पोलीस ठाण्यात हा गुन्हा नोंदवण्यात आला आहे. संबंधित वाहन गौतमी पाटीलच्या नावावर नोंदणीकृत असले तरी, अपघातावेळी गाडी चालवणारा ड्रायव्हर घटनेसाठी जबाबदार आहे.
पोलिसांनी ड्रायव्हरवर पूर्ण कारवाई केली असून, त्याचे वैद्यकीय तपासणी करण्यात आले आहे. तसेच, रक्ताचे नमुने रासायनिक विश्लेषण प्रयोगशाळेत (CA) पाठवण्यात आले आहेत. या घटनेतील साक्षीदार आणि फिर्यादी यांचे ऑडिओ-व्हिडिओ रेकॉर्डिंगद्वारे जबाब नोंदवण्यात आले आहेत. पोलिसांनी अपघातग्रस्त वाहन जप्त केले असून, त्याची आरटीओ तपासणी पूर्ण झाली आहे. या प्रकरणाचा तपास अजूनही सुरू आहे. तक्रारदार किंवा जखमींच्या नातेवाईकांना कोणतीही माहिती हवी असल्यास, ते पोलिसांशी संपर्क साधू शकतात, असेही पोलिसांनी नमूद केले आहे.
