NCP alliance : पवारांच्या राष्ट्रवादीची सत्तेकडे वाटचाल? दादांबरोबर युती पहिली पायरी? दोन्ही एकत्र येण्याची पुण्यातून नांदी?

महाराष्ट्रातील आगामी महापालिका निवडणुकांमध्ये राष्ट्रवादी काँग्रेसच्या दोन्ही गटांच्या एकत्र लढण्याबाबत चर्चांना उधाण आले आहे. पुणे, पिंपरी आणि ठाणे या तीन महत्त्वाच्या शहरांमध्ये दोन्ही राष्ट्रवादी एकत्र येण्याची शक्यता वर्तवली जात आहे, ज्यामुळे शरद पवारांच्या राष्ट्रवादी काँग्रेसची सत्तेच्या दिशेने वाटचाल सुरू झाल्याचे बोलले जात आहे. या घडामोडींमुळे दोन्ही गटांच्या विलीनीकरणाच्या चर्चांना वेग आला आहे. गेल्या काही दिवसांपासून दोन्ही राष्ट्रवादीच्या प्रमुख नेत्यांमध्ये भेटीगाठी वाढल्या आहेत.

सूत्रांनुसार, सुप्रिया सुळे आणि अजित पवार यांच्यात देवगिरी येथे बैठक झाली, ज्यात अजित पवार गटाचे वरिष्ठ नेतेही उपस्थित होते. त्याचप्रमाणे, सिल्व्हर ओकवरही शरद पवार, सुप्रिया सुळे आणि अजित पवार यांच्यात चर्चा झाल्याचे समजते. शरद पवारांच्या वाढदिवसानिमित्त दिल्लीत आयोजित स्नेहभोजनास गौतम अदानी, राहुल गांधी, प्रियांका गांधी, अजित पवार आणि प्रफुल्ल पटेल उपस्थित होते. या स्नेहभोजनादरम्यान शरद पवार आणि अजित पवार यांच्यात 20 मिनिटे बंद दाराआड चर्चा झाल्याची माहिती आहे. या भेटीनंतर प्रफुल्ल पटेल यांनी पंतप्रधान नरेंद्र मोदी यांची भेट घेतल्यामुळे राजकीय भुवया उंचावल्या आहेत.