Manoj Jarange Patil : मुंडेंचं ‘ते’ चॅलेंज मनोज जरांगे पाटलांनी स्विकारलं, पोलीस अधीक्षकांकडे नार्कोटेस्टचा अर्ज सुपूर्द

राष्ट्रवादी काँग्रेसचे नेते धनंजय मुंडे यांनी मनोज जरांगे पाटील यांना दिलेल्या नार्को टेस्टच्या आव्हानाचा जरांगे यांनी स्वीकार केला आहे. जरांगे यांच्या सहकाऱ्यांनी पोलिस अधीक्षकांकडे या संदर्भात अधिकृत अर्ज सुपूर्द केला आहे. धनंजय मुंडे यांनी काही दिवसांपूर्वी मनोज जरांगे यांना तुम्हीही नार्को टेस्ट करा आणि माझीही करा असे म्हटले होते. यावर प्रतिक्रिया देताना जरांगे पाटील यांनी हे आव्हान स्वीकारल्याचे जाहीर केले. मात्र, त्यांनी एक महत्त्वाची अट ठेवली आहे.

मनोज जरांगे पाटील यांच्या म्हणण्यानुसार, जर नार्को टेस्ट करायची असेल तर ती केवळ एका व्यक्तीची न करता संबंधित 10 ते 12 जणांची केली जावी. एकट्या कोणाचीही नार्को टेस्ट करण्यास त्यांनी ठाम नकार दिला आहे. पोलिस अधीक्षकांसोबत झालेल्या चर्चेनंतर जरांगे यांच्या सहकाऱ्यांनी माध्यमांना ही माहिती दिली. या मागणीमध्ये पोलिस अधीक्षक, जिल्हाधिकारी किंवा गृहविभाग यांचा थेट उल्लेख नसल्याचेही स्पष्ट करण्यात आले. मनोज जरांगे पाटील यांची ही ठाम भूमिका आहे की, जर तपास करायचा असेल तर तो सर्वांचा व्हावा, अन्यथा कोणाचाही नको. या प्रकरणामुळे महाराष्ट्राच्या राजकारणात आणखी एक नवा पैलू समोर आला आहे.