Bachchu Kadu : बच्चू कडूंचा नागपुरात एल्गार, सरकारला आज दुपारी 12 पर्यंतचा अल्टीमेटम; आता महामार्ग ठप्प नंतर….

नागपूरमध्ये शेतकरी कर्जमाफीसह विविध मागण्यांसाठी बच्चू कडू यांच्या नेतृत्वाखाली विराट ट्रॅक्टर मोर्चा काढण्यात आला आहे. या आंदोलनाचा आज दुसरा दिवस असून, यामुळे नागपूर-जबलपूर, नागपूर-वर्धा आणि नागपूर-हैदराबाद यांसह चार प्रमुख महामार्ग ठप्प झाले आहेत. जामठा चौकात ठिय्या आंदोलन सुरू आहे.

ग्रामीण भागातील घरकुलांसाठी पाच लाख रुपये अनुदान, शेतकऱ्यांची कर्जमाफी, धान्याला योग्य हमीभाव आणि दूध भेसळ रोखण्यासाठी नियमावली तयार करण्याची मागणी आंदोलकांनी केली आहे. बच्चू कडूंनी सरकारला आज दुपारी १२ वाजेपर्यंतचा अल्टीमेटम दिला असून, तोपर्यंत चर्चेचा प्रस्ताव न आल्यास रेल्वे मार्गही रोखण्याचा इशारा दिला आहे. आंदोलनास्थळी मोठ्या संख्येने पोलीस बंदोबस्त तैनात करण्यात आला असून, हजारो शेतकरी या मोर्चात सहभागी झाले आहेत. अनेक शेतकरी एक ते दीड महिन्याचे राशन घेऊन आपल्या मागण्यांवर ठाम आहेत.