Nagpur Election : नागपुरात अपक्ष उमेदवारालाच लोकांनी घरातच कोंडलं, BJP नं दिलेला AB फॉर्म रद्द अन्…नेमकं घडलं काय?

नागपूरमध्ये स्थानिक स्वराज्य संस्था निवडणुकीत नाट्यमय घडामोडी घडल्या आहेत. प्रभाग १३ ड मधील अपक्ष उमेदवार किसन गावंडे यांना त्यांच्याच परिसरातील नागरिकांनी घरात बंद केले आहे. गावंडे यांनी उमेदवारी अर्ज मागे घेऊ नये, अशी त्यांची मागणी आहे. यापूर्वी, किसन गावंडे यांना भाजपने दिलेला एबी फॉर्म रद्द झाला होता, त्यामुळे त्यांनी अपक्ष म्हणून अर्ज दाखल केला होता. आज उमेदवारी अर्ज मागे घेण्याचा शेवटचा दिवस असल्याने भाजपने त्यांना अर्ज मागे घेण्यास सांगितले होते. या परिस्थितीवर नियंत्रण मिळवण्यासाठी भाजप नेते परिणय फुके यांनी मध्यस्थी करण्याची तयारी दर्शवली आहे. फुके यांनी सांगितले की, किसन गावंडे स्वतः अर्ज मागे घेण्यासाठी तयार आहेत, त्यांनीच त्यांना बोलावले आहे. फुके यांनी कार्यकर्त्यांची समजूत काढून ते पक्षाचा आदेश पाळतील असा विश्वास व्यक्त केला. ते म्हणाले की, हे कार्यकर्ते भारतीय जनता पार्टीचे निष्ठावंत आहेत आणि पक्षाचा अनादर करणार नाहीत.