NCP Shiv Sena coalition : नाशिकनंतर पुण्यात अजित दादांची राष्ट्रवादी अन् शिंदे सेना भाजपविरोधात एकत्र येणार?

नाशिकमध्ये भाजपविरोधात एकत्र आल्यानंतर, आता पुणे आणि पिंपरी-चिंचवड महापालिकेसाठी अजित पवारांच्या नेतृत्वाखालील राष्ट्रवादी काँग्रेस आणि एकनाथ शिंदे यांच्या नेतृत्वाखालील शिवसेना युती करण्याच्या तयारीत आहे. ही युती भाजपच्या विरोधात असणार असल्याचे संकेत मिळत आहेत. अजित पवारांनी स्वतःच या युतीबद्दलचे सूतोवाच केले आहे. नुकतीच अजित पवारांनी राज्याचे उद्योगमंत्री उदय सामंत यांच्याशी युतीच्या मुद्द्यावर चर्चा केली.

पुन्हा अजित पवार आणि उदय सामंत यांच्यात बैठक होणार असून, पुणे आणि पिंपरी-चिंचवडमधील संभाव्य युतीबाबत या बैठकीत महत्त्वाचा निर्णय होण्याची शक्यता आहे. पुण्यात शिंदे गटाचे आमदार रवींद्र धंगेकर यांनी भाजप विरोधात भूमिका घेतली आहे. धंगेकर यांचा अजित पवारांप्रती सकारात्मक दृष्टिकोन असल्याचे दिसून येते. त्यांनी यापूर्वीही युतीबाबत चर्चा करण्यासाठी अजित पवारांची भेट घेतली होती. त्यामुळे पुण्यात अजित पवारांची राष्ट्रवादी आणि शिंदे गटाच्या शिवसेनेची युती होण्याची दाट शक्यता व्यक्त होत आहे. नाशिकमध्ये राबवलेला पॅटर्न आता पुणे आणि पिंपरी-चिंचवडमध्येही लागू होण्याची शक्यता वर्तवली जात आहे.