राज ठाकरेंकडून भावाचा उल्लेख ‘शिवसेना पक्षप्रमुख’; ट्विटमुळे चर्चांना उधाण

उद्धव ठाकरे यांच्या वाढदिवसानिमित्त मनसेप्रमुख राज ठाकरे यांनी मातोश्रीवर भेट देऊन आपल्या मोठ्या बंधूंना शुभेच्छा दिल्या. या मुंबईतील घडामोडींमुळे राज्याच्या राजकारणात खळबळ उडाली आहे. यातच राज ठाकरे यांनी एका ट्वीटद्वारे आणखी एक धक्कादायक खुलासा केला, ज्याने राजकीय वर्तुळात नवे वादळ निर्माण झाले आहे. या एका वाक्याने राजकारणात नवे समीकरण उदयास आले असून, राजकीय विश्लेषकांच्या मते, यातून भाजप आणि शिंदे सेनेला स्पष्ट इशारा देण्यात आला आहे.

राज ठाकरे यांनी आपल्या एक्स हँडलवरून एक ट्वीट केले, ज्यात उद्धव ठाकरे यांच्यासोबतचा फोटो शेअर करत ते म्हणाले, “माझे मोठे बंधू, शिवसेना पक्षप्रमुख उद्धव ठाकरे यांना त्यांच्या वाढदिवसानिमित्त मातोश्री, आदरणीय बाळासाहेब ठाकरे यांच्या निवासस्थानी भेट देऊन शुभेच्छा दिल्या.” या ट्वीटमधून त्यांनी योग्य संदेश दिल्याचे मानले जात आहे. विशेषतः, यातून भाजप आणि शिंदे सेनेला थेट इशारा देण्यात आल्याचे राजकीय विश्लेषकांचे मत आहे. तसेच, मनसे आणि शिवसेना (उद्धव बाळासाहेब ठाकरे) यांच्यातील युतीची वाटचाल आता अधिक ठोस आणि आशादायी दिशेने पुढे सरकत असल्याचे मानले जात आहे.