Deepak Kesarkar : …म्हणून नितेश राणेंनी भान ठेवलं पाहिजे, दीपक केसरकरांनी लगावला टोला

सिंधुदुर्ग जिल्ह्याच्या राजकारणात युतीबाबत नवीन चर्चा सुरू झाली आहे. शिवसेनेचे आमदार दीपक केसरकर यांनी पालकमंत्री नितेश राणे यांना युतीबाबत पुन्हा विचार करण्याचे आवाहन केले आहे. आगामी निवडणुकांमध्ये जिल्ह्यामध्ये एकजूट कायम ठेवण्यासाठी नितेश राणेंनी पुढाकार घ्यावा, अशी त्यांची अपेक्षा आहे.

केसरकर यांनी स्पष्ट केले की, स्वतः आमदार म्हणून ते आणि निलेश राणे गेली वर्षभर नितेश राणेंच्या पाठीशी ठामपणे उभे आहेत. जिल्ह्यामध्ये उत्तम समन्वय साधला गेला आहे आणि मागील निवडणुकाही एकत्र लढवल्या आहेत. हे वातावरण असेच पुढे कायम राहावे यासाठी राणेंनी युतीचा विचार करावा, असे केसरकर यांचे मत आहे. त्यांनी हे देखील अधोरेखित केले की, युतीसाठी त्यांची कुठल्याही पदाची अपेक्षा नाही. आम्ही या बाबतीत नेहमीच लवचिक आहोत, असे केसरकर यांनी सांगितले. त्यामुळे आता नितेश राणे या आवाहनावर काय भूमिका घेतात हे पाहणे महत्त्वाचे ठरेल.