Vaibhav Naik : प्रताप सरनाईक यांची भाजपच्या दिशेने वाटचाल… ठाकरे गटाच्या नेत्याचा गौप्यस्फोट काय?

आमदार वैभव नाईक यांनी सध्याच्या राजकीय घडामोडींवर भाष्य केले आहे. त्यांच्या मते, बाळासाहेबांची शिवसेना म्हणून ओळखल्या जाणाऱ्या पक्षातील मंत्री प्रताप सरनाईक यांची वाटचाल भाजपच्या दिशेने सुरू असल्याचे दिसत आहे. बाळासाहेबांच्या जयंतीनिमित्त किंवा वाढदिवसानिमित्त कार्यक्रम करण्याऐवजी ते मित्रपक्षाच्या नेत्याच्या वाढदिवसाला उपस्थित राहिल्याने हे दिसून येते, असे नाईक म्हणाले.

तर दुसरीकडे, मुख्यमंत्री देवेंद्र फडणवीस यांच्या बिहारमधील स्टार प्रचारक भूमिकेवरही नाईक यांनी प्रश्नचिन्ह उपस्थित केले. मराठवाड्यातील आपद्ग्रस्त शेतकऱ्यांना दिवाळीपूर्वी नुकसान भरपाई मिळालेली नाही. त्यामुळे मुख्यमंत्र्यांनी महाराष्ट्रातील प्रश्न सोडवून मगच प्रचारासाठी जावे, अशी जनतेची अपेक्षा असल्याचे नाईक यांनी म्हटले आहे.

दरम्यान, सिंधुदुर्गमध्ये ठाकरे गट आणि मनसे एकत्र येण्याची चर्चा सुरू असून, त्यांची भेटही झाली आहे. या सरकारच्या विरोधात उद्धव बाळासाहेब ठाकरे आणि राज ठाकरे यांच्या नेतृत्वाखाली शिवसैनिक आणि मनसैनिक एकत्र येत असल्याचे नाईक यांनी सांगितले. मनसेच्या दिवाळी महोत्सवाच्या उद्घाटनासाठी उद्धव ठाकरे यांना निमंत्रण देण्यात आले आहे. ठाकरे गट हिंगोलीमध्ये स्थानिक स्वराज्य संस्थांच्या निवडणुका स्वबळावर लढवण्यास तयार असला तरी, महाविकास आघाडीसोबत मतदारसंघात निवडणूक लढवणार असल्याचेही नाईक यांनी नमूद केले.