युवा सेनाप्रमुख आदित्य ठाकरे हे अखेर निवडणुकीच्या रिंगणात उतरणार आहेत. 'मी निवडणूक लढवणार', अशी घोषणा आदित्य ठाकरे यांनी वरळीतील शिवसैनिकांच्या मेळाव्यात केली.
आदित्य ठाकरेंनी निवडणूक लढणार असल्याची घोषणा करताच त्यांचे छोटे बंधू तेजस ठाकरे यांनी मंचावर येऊन आदित्य यांची गळाभेट घेतली.
आदित्य ठाकरे यांनी त्यांच्या उमेदवारीची घोषणा केली, तेव्हा ठाकरे कुटुंबियांसह शिवसेनेचे नेतेही उपस्थित होते. खासदार संजय राऊत यांच्यासह व्यासपीठावरील सर्व नेत्यांनी आदित्य ठाकरेंना शुभेच्छा दिल्या.
ही माझ्यासाठी ऐतिहासिक झेप आहे. मी ही सुरुवात करत आहे, त्याआधी मी 10 वर्षांपासून महाराष्ट्र पिंजून काढला. आता निवडणूक लढवत आहे, असं आदित्य ठाकरे म्हणाले. आदित्य ठाकरे 2 किंवा 3 ऑक्टोबरला विधानसभा निवडणुकीसाठी आपला उमेदवारी अर्ज सादर करणार असल्याचं सांगितलं जात आहे.