आमचा मागील रेकॉर्ड तोडू; नागपूरच्या रॅलीत फडणवीसांनी व्यक्त केला विश्वास
नागपुरात देवेंद्र फडणवीस यांनी विशाल शक्तीप्रदर्शन करत महायुतीचा विजय निश्चित असल्याचा दावा केला. नागपूरमध्ये मागील सर्व रेकॉर्ड तोडून महायुती विजयी होईल, असा विश्वास त्यांनी व्यक्त केला. तसेच, मुंबई महानगरपालिकेतही भगवा फडकेल असे ते म्हणाले. 15 तारखेला कमळ आणि धनुष्यबाणाचे बटन दाबण्याचे आवाहन त्यांनी केले.
नागपुरात भारत माता चौक ते महाल परिसरापर्यंत भाजपने मोठे शक्तीप्रदर्शन केले. या प्रचारफेरीचे नेतृत्व करत असताना, मुख्यमंत्री देवेंद्र फडणवीस यांनी महायुती नागपुरात आपलाच मागील रेकॉर्ड तोडून विजयी होईल, असा विश्वास व्यक्त केला. छत्रपती शिवाजी महाराजांच्या पुतळ्याला अभिवादन केल्यानंतर फडणवीस स्वतः बाईक रॅलीमध्ये सहभागी झाले होते. जनतेने महायुतीला निवडून देण्याचा निर्णय घेतल्याचा आणि महायुती प्रचंड जागा घेऊन विजयी होणार असल्याचा दावा त्यांनी केला.
फडणवीस म्हणाले की, नागपूरमध्ये महायुती आपला मागील रेकॉर्ड निश्चितपणे तोडेल. कालच्या शिवाजी पार्क येथील ऐतिहासिक सभेनंतर आपला आत्मविश्वास वाढल्याचे सांगत, मुंबई काबीज करण्याचा आत्मविश्वास पहिल्या दिवसापासूनच असल्याचे त्यांनी स्पष्ट केले. मुंबईकरांचा महायुतीवर पूर्ण विश्वास असून ते महायुतीच्याच पाठीशी उभे राहतील असेही ते म्हणाले.
प्रचाराच्या शेवटच्या दिवशी आयोजित या अतिभव्य रोड शोला नागरिकांकडून मिळालेल्या प्रचंड प्रतिसादामुळे आता विजयाबद्दल कोणतीही शंका नसल्याचे फडणवीस यांनी नमूद केले. माननीय नितीन गडकरी यांच्या नेतृत्वाखाली नागपूर महानगरपालिका आपला मागचा रेकॉर्ड मोडल्याशिवाय राहणार नाही, असा विश्वास त्यांनी व्यक्त केला. या ठिकाणी भाजप-सेना युतीचा भगवा नागपूरच्या महानगरपालिकेवर फडकणार असून, तोच भगवा मुंबईला देखील लागणार आहे, असे त्यांनी सांगितले. महाराष्ट्रात सगळीकडे या निवडणुकीमध्ये महायुतीचाच विजय होईल, असा दावा त्यांनी केला.
