Mumbai BMC Election : मोठी बातमी… मुंबईत महायुतीचा जागावाटप फॉर्म्युला अखेर ठरला; भाजप, शिंदेसेना किती जागा लढवणार?

मुंबई महानगरपालिका निवडणुकीसाठी महायुतीचा जागावाटप फॉर्म्युला निश्चित झाल्याची माहिती सूत्रांनी दिली आहे. यानुसार, भाजपने 140 जागा लढवण्याचा निर्णय घेतला आहे, तर उपमुख्यमंत्री एकनाथ शिंदे यांच्या नेतृत्वाखालील शिवसेनेला 87 जागा मिळणार आहेत. यासोबतच, रिपब्लिकन पक्षाला (आरपीआय) भाजपच्या कोट्यातून काही जागा दिल्या जाणार आहेत. गेल्या काही दिवसांपासून मुंबई महापालिकेत शिवसेना आणि भाजप एकत्र लढणार हे स्पष्ट झाले होते. त्यानंतर महायुतीच्या घटक पक्षांमध्ये जागावाटपाबाबत बैठकांचे अनेक फेऱ्या झाल्या. सुरुवातीला भाजपला 150 जागा लढवण्याची इच्छा होती, परंतु शिंदेसेनेलाही मुंबईत अधिक जागा हव्या असल्यामुळे जागावाटपावर रस्सीखेच सुरू होती. सद्यस्थितीत, दोन्ही पक्षांमध्ये प्राथमिक सहमती झाली असून, 140 आणि 87 हा फॉर्म्युला ठरला आहे. तथापि, बैठका अजूनही सुरू असून, अंतिम शिक्कामोर्तब होणे बाकी आहे.