Hemlata Sawaji : गळ्यात सोन्याचं ‘कमळ’, नगराध्यक्षा हेमलता सावजी यांच्या मंगळसूत्राची राज्यात तुफान चर्चा

महादुला नगरपंचायत निवडणुकीच्या निकालानंतर एक लक्षवेधी प्रसंग समोर आला आहे. भारतीय जनता पक्षाच्या नगराध्यक्षा हेमलता सावजी यांनी तिसऱ्यांदा विजय मिळवल्यानंतर आपल्या गळ्यात कमळाचे चिन्ह असलेले मंगळसूत्र परिधान केले. महसूल मंत्री चंद्रशेखर बावनकुळे यांचे निवासस्थान असलेल्या महादुला येथे ही घटना घडली, ज्यामुळे स्थानिक राजकीय वर्तुळात चर्चांना उधाण आले आहे.

विजयानंतर पत्रकारांशी संवाद साधताना, नगराध्यक्षा हेमलता सावजी यांनी सांगितले की, भारतीय पक्षाने त्यांना नगराध्यक्ष पदाची उमेदवारी दिली आणि त्या भरघोस मतांनी निवडून आल्या. त्यामुळे पक्षाचे कमळ चिन्ह परिधान करणे त्यांना खूप चांगले वाटले. पक्षावरील आपली निष्ठा आणि प्रेम व्यक्त करण्यासाठी हे पाऊल उचलल्याचे त्यांनी स्पष्ट केले. यापुढेही हे मंगळसूत्र परिधान करणार असल्याचे त्यांनी आवर्जून सांगितले. या घटनेमुळे भाजप कार्यकर्त्यांमध्ये उत्साहाचे वातावरण निर्माण झाले असून, स्थानिक स्वराज्य संस्थांच्या निवडणुकीतील हा एक महत्त्वाचा आणि स्मरणीय क्षण ठरला आहे.