Eknath Shinde : व्हॅनिटी व्हॅन घेऊन फिरणारा, वर्क फ्रॉम होम अन FB लाईव्ह करणारा मी नाही… शिंदेंचा ठाकरेंवर निशाणा

उपमुख्यमंत्री एकनाथ शिंदे यांनी दसरा मेळाव्यात बोलताना शेतकऱ्यांच्या समस्यांवर प्रकाश टाकला आणि त्यांना दिलासा देण्याचे आश्वासन दिले. “परिस्थिती भयानक आहे, अशा परिस्थितीत सरकार आणि शिवसेना शेतकऱ्यांच्या पाठीशी खंबीरपणे उभी राहील,” असे शिंदे म्हणाले. त्यांनी पूरग्रस्त आणि दुष्काळग्रस्त शेतकऱ्यांना दिवाळीपूर्वी मदत देण्याचे वचन दिले. स्वतःला शेतकऱ्याचा मुलगा संबोधत, त्यांना शेतकऱ्यांची दु:ख आणि वेदना माहीत असल्याचे सांगितले.

यावेळी शिंदे यांनी अप्रत्यक्षपणे उद्धव ठाकरे यांच्यावर निशाणा साधला. “कपड्याची इस्त्री सांभाळणार आणि व्हॅनिटी व्हॅन घेऊन दौरा करणारा हा एकनाथ शिंदे नाही,” असे ते म्हणाले. “वर्क फ्रॉम होम ऑन फेसबुक लाईव्ह करणाराही हा एकनाथ शिंदे नाही,” असे म्हणत त्यांनी आपल्या नेतृत्वाची तुलना केली. बाळासाहेब ठाकरे यांच्या विचारांचा संदर्भ देत, संकटकाळात कार्यकर्ता घरात न बसता लोकांच्या दारात दिसला पाहिजे, असे ते म्हणाले. शिवसैनिकांनी नैसर्गिक आपत्तीत केलेल्या मदतीचे आणि त्यांच्या बांधिलकीचे त्यांनी कौतुक केले.