Maharashtra News LIVE : भोंदू बाबा अशोक खरातची पोलीस कोठडी आज संपणार

भोंदू अशोक खरातची पोलीस कोठडी आज संपत असून, त्याला आज तिसऱ्यांदा न्यायालयात हजर केले जाणार आहे. मिरगाव येथील फार्महाऊसवर पोलिसांनी केलेल्या धाडीत आतापर्यंत अनेक धक्कादायक खुलासे झाले आहेत. तपासादरम्यान पोलिसांनी तिथून एक पिस्तूल, २१ जिवंत काडतुसे आणि ५ वापरलेली काडतुसे जप्त केली होती. याशिवाय, मोठ्या प्रमाणावर रोकड, मौल्यवान वस्तू आणि जादूटोण्याशी संबंधित संशयास्पद साहित्यही हाती लागले आहे. पोलिसांनी जप्त केलेली सीसीटीव्ही फुटेज, इलेक्ट्रॉनिक उपकरणे आणि व्यवहारांच्या नोंदी असलेल्या डायऱ्यांमधून आणखी काही मोठी नावे समोर येण्याची शक्यता वर्तवण्यात येत आहे. खरातच्या पोलीस कोठडीत वाढ होणार की त्याला न्यायालयीन कोठडी सुनावली जाणार, याकडे सर्वांचे लक्ष लागले आहे. तर दुसरीकडे, जागतिक युद्धाच्या सावटा मुळे आंतरराष्ट्रीय स्तरावर पुरवठा साखळी विस्कळीत झाली असून, त्याचे गंभीर परिणाम आता सर्वसामान्यांच्या स्वयंपाकघरात जाणवू लागले आहेत. गॅस आणि इंधन टंचाईमुळे अनेक ठिकाणी सिलेंडरचा मोठा तुटवडा निर्माण झाला आहे. ग्राहकांना वेळेवर गॅस मिळत नसल्याने संताप व्यक्त केला जात आहे. वाढती मागणी आणि मर्यादित साठा यामुळे आगामी काळात गॅसच्या दरात मोठी वाढ होण्याची भीती व्यक्त केली जात असून, प्रशासनाकडून परिस्थितीवर नियंत्रण मिळवण्याचे प्रयत्न सुरू आहेत. राज्यातील ठळक बातम्यांची अपडेट या लाईव्ह ब्लॉगमध्ये वाचा.