Marathi News Photo gallery Yed Lagla Premach actress pooja birari shot for bailgada sharyat in pandharpur watch photos
अभिनेत्रीने पहिल्यांदाच घेतला बैलगाडा शर्यतीत भाग; बॉडी डबल न वापरता केलं शूटिंग
मालिकेसाठी प्रत्यक्षात बैलगाडा शर्यतीचा सीन शूट करण्याचा अनुभव माझ्या आठवणींच्या शिदोरीत कायम असेल, अशी प्रतिक्रिया पूजाने दिली. 'येड लागलं प्रेमाचं' ही नवी मालिका येत्या 27 मे पासून रात्री 10.30 वाजता स्टार प्रवाह वाहिनीवर प्रेक्षकांच्या भेटीला येणार आहे.
स्वाती वेमूल |
Updated on: May 02, 2024 | 11:28 AM
Share
स्टार प्रवाह वाहिनीवर येत्या 27 मे पासून 'येड लागलं प्रेमाचं' ही नवी मालिका सुरू होतेय . राया आणि मंजिरी ही या मालिकेतली प्रमुख पात्र आहेत. एकमेकांचा तिरस्कार करणाऱ्या राया आणि मंजिरीचा प्रेमात पडण्यापर्यंतचा प्रवास म्हणजे 'येड लागलं प्रेमाचं' ही मालिका.
1 / 6
मालिकेत प्रेक्षकांना बैलगाडा शर्यतीचा एक सीन पाहायला मिळणार आहे. मंजिरीला बैलगाडा शर्यतीत भाग घ्यावा लागतो. ही स्पर्धा ती जिंकते का, हे पाहणं औत्सुक्याचं ठरणार आहे. या सीनचं शूटिंग पंढरपुरात करण्यात आलं आहे. अभिनेत्री पूजा बिरारीने बैलगाडा शर्यतीच्या शूटिंगचा अनुभव सांगितला.
2 / 6
"बैलगाडा शर्यत शूट करायची असं ठरल्यापासून मनात खूप उत्सुकता होती. मी कधीच बैलगाडी चालवली नाही. त्यामुळे प्रत्यक्ष अनुभव घेण्याची खूपच उत्सुकता होती. पंढरपुरात आम्ही ही बैलगाडा शर्यत शूट केली. जवळपास चार ते सहा दिवस या खास भागाचं शूट सुरू होतं," असं तिने सांगितलं.
3 / 6
याविषयी ती पुढे म्हणाली, "सुर्योदयापासून ते सुर्यास्तापर्यंत आम्ही याच सीनवर मेहनत घेत होतो. मात्र टीममधल्या कुणाच्याही चेहऱ्यावर थकल्याचे भाव नव्हते. सीन अधिकाधिक चांगला कसा होईल याकडेच सर्वांचं लक्ष होतं. बैलगाडी चालवणं हे मोठं आव्हान तर होतंच पण त्यासोबतच बैलांसोबत जुळवून घेणं म्हणजे तारेवरची कसरत होती."
4 / 6
"बैलगाडी नुसती चालवायची नव्हती तर ती शर्यतीत पळवायची होती. त्यामुळे खूप काळजी घेऊन शूट करावं लागत होतं. आमच्या टीमने सर्वांचीच उत्तम सोय केली होती. दिग्दर्शकासोबतच बैलांच्या खऱ्या मालकांनीदेखील मला बैलगाडी चालवण्याचे धडे दिले. मी हा सीन बॉडी डबलची मदत न घेता केला," असं पूजाने स्पष्ट केलं.
5 / 6
"शूटिंगच्या दिवशी सगळे गावकरी हा सीन पहाण्यासाठी जमले होते. खरंतर खूप वेळा रिटेक्स झाले. मात्र आम्ही सर्वांनी हा सीन हताश न होता पूर्ण केला. मालिकेतला राया म्हणजेच अभिनेता विशाल निकमने या सीनसाठी मला खूप मदत केली. सर्वात महत्त्वाचं म्हणजे ज्या बैलांसोबत मी हा सीन शूट केला त्यांनी मला खूप सहकार्य केलं. त्यांची मी नेहमी ऋणी असेन. माझ्यासाठी हा अतिशय विलक्षण आणि अविस्मरणीय अनुभव होता," अशा शब्दांत पूजा व्यक्त झाली.
