पक्ष म्हणून नाही तर परिवार म्हणून एकत्र आलोय! अमित ठाकरेंचं मोठं वक्तव्य

मुंबई महानगरपालिका निवडणुकीचा प्रचार आता अंतिम टप्प्यात आला असून, सुपर संडे निमित्त राजकीय पक्षांनी जोरदार शक्तीप्रदर्शन केले. महाराष्ट्र नवनिर्माण सेनेच्या वतीने मुंबईत भव्य मोटारसायकल रॅली काढण्यात आली, ज्यात मनसे सैनिक, शिवसैनिक मोठ्या संख्येने सहभागी झाले होते. या रॅलीत अमित ठाकरे स्वतः सहभागी झाले होते.

यावेळी बोलताना अमित ठाकरेंनी प्रचाराला मुंबईकरांकडून उत्तम प्रतिसाद मिळत असल्याचे सांगितले. “पक्ष म्हणून नाही तर परिवार म्हणून सर्व एकत्र आले आहेत,” असे म्हणत त्यांनी महाराष्ट्र नवनिर्माण सेना, उद्धव बाळासाहेब ठाकरे शिवसेना आणि शरद पवार राष्ट्रवादी काँग्रेस यांच्या युतीचे महत्त्व अधोरेखित केले.

आगामी मुंबई महानगरपालिकेत मराठी महापौर बसणार असल्याचा ठाम विश्वास त्यांनी व्यक्त केला. विरोधकांकडून होणाऱ्या टीकेला उत्तर देण्यास नकार देत, लोकांपर्यंत पोहोचण्यावर आणि पक्षाचे वचननामे मांडण्यावर भर असल्याचे त्यांनी स्पष्ट केले. तसेच, आज सायंकाळी शिवतीर्थावर होणाऱ्या राज ठाकरे यांच्या सभेची आपल्यालाही उत्सुकता असल्याचे अमित ठाकरेंनी नमूद केले. मुंबईत शिवसेनेचाच भगवा आणि महापौर बसणार असा विश्वास त्यांनी व्यक्त केला.