Parth Pawar Land Deal : माझ्यावर दबाव आणला अन् त्यावेळी… एकनाथ खडसेंचा गौप्यस्फोटानं खळबळ
एकनाथ खडसे यांनी कोरेगाव पार्क जमिनीच्या विक्री परवानगीसाठी आलेली फाईल नाकारल्याचे सांगितले. 2013 मध्ये बाळासाहेब थोरात यांनीही ती नाकारली होती. नंतर या फाईलवर दबाव आणला गेला. सरकारी जमीन बेकायदेशीरपणे खरेदी करणे हा फौजदारी गुन्हा असून, संबंधित सर्वांवर कारवाई व्हावी, अशी खडसेंनी मागणी केली.
माजी मंत्री एकनाथ खडसे यांनी कोरेगाव पार्क येथील जमिनीच्या विक्री परवानगी संदर्भातील एका फाईलबाबत महत्त्वपूर्ण खुलासा केला आहे. त्यांच्या माहितीनुसार, ही फाईल त्यांच्याकडे परवानगीसाठी आली होती. खडसेंनी या फाईलची तपासणी केली असता, त्यांना असे आढळून आले की 2013 मध्ये तत्कालीन महसूल मंत्री बाळासाहेब थोरात यांच्याकडेही ती फाईल आली होती आणि त्यांनीही तिला परवानगी नाकारली होती. यापूर्वी, हे प्रकरण उच्च न्यायालयातही गेले होते, मात्र उच्च न्यायालयाने देखील याला परवानगी दिली नव्हती, असे खडसेंनी नमूद केले.
खडसेंनी पुढे सांगितले की, त्यांनी फाईल नाकारल्यानंतर बिल्डर्स आणि डेव्हलपर्सकडून सातत्याने पाठपुरावा आणि फोनद्वारे त्यांच्यावर दबाव आणण्याचा प्रयत्न करण्यात आला. सरकारी जमीन बेकायदेशीरपणे खरेदी करणे हा फौजदारी गुन्हा आहे. या व्यवहारात सहभागी असलेल्या सर्वांवर, ज्यात सब-रजिस्ट्रार, मुखत्यारपत्र घेणारे आणि जमीन खरेदी करणाऱ्या कंपनीचा समावेश आहे, त्यांच्यावर फौजदारी गुन्हा दाखल करून कठोर कारवाई व्हावी, अशी मागणी एकनाथ खडसे यांनी केली आहे. हा संगनमताने केलेला गुन्हा असल्याचे त्यांनी म्हटले आहे.
